Dayika Uveyş di salvegera 32’yemîn a wefata xwe de, li ser gora xwe ya li gundê Amara ya girêdayî navçeya Xelfetî ya Rihayê hate bîranîn.
Ji xeynî endamên malbatê ji Partiya Wekhevî û Demokrasiyê ya Gelan (DEM Partî) siyasetmedar, rêveberên KATDER’ê, xwişka Alî Çîçek ê li girtîgeha Amedê jiyana xwe ji dest da, Ayşe Çîçek û gelek kesên din beşdarî bîranînê bûn.
Hevseroka DEM Partiyê ya Rihayê Sema Aişeoglû di bîranînê de axivî û got, Dayika Uveyş li dijî sîstema desthilatdariya mêr têkoşiya ye.
Dayikên Aştiyê Fatma Aktaş û Adalet Çay, aktîvîsta TJA’yê Edle Fîdan jî Dayika Uveyş bi bîr anîn. Beşdaran gul danîn ser gorê û piştre çûn serdana mala ku Rêber Apo lê ji dayik bûye.
