Dayikên Şemiyê û parêzvanên mafên mirovan ên li Qada Galatasarayê hatin ba hev, di çalakiya 991’an de ji bo Hasan Ocak hatin ba hev. Hasan Ocak 21’ê Adara 1995’an di bin çavan de hate windakirin û 18’ê Gulana 1995’an li goristana bêkesan hate dîtin.
Ji Hevserokatiya Giştî ya Komeleya Mafên Mirovan (ÎHD) Eren Keskîn daxuyaniya vê hefteyê xwend û got: “Yên ku dixwazin şopa heqîqetê binixumînin, bila bizanin ku em ê pêşî li vê yekê bigirin.”
Eren Keskîn çîroka Hasan Ocak xwend. Birayê mezin ê Hasan Ocak, Alî Ocak jî wiha got: “Çend sal derbas bibin, bila derbas bibin wê îradeya me ya hesabpirsînê dewam bike.”
Xwişka Hasan Ocak, Masîde Ocak jî peyama dayika xwe Emîne Ocak ku ji ber pirsgirêkên tenduristiyê nekarî were çalakiyê, wiha ragihand: “Ez pir kal im, nikarim werim. Lê çi dibe bila bibe ez dest ji Hasan û zarokên din bernadim.”
Piştî axaftinan li Qada Galatasarayê ya di bin dorpêça bariyera polîsan de, ji bo bîranîna Hasan Ocak qurnefîl hatin danîn.
