Dayikên Şemiyê 1063’yemîn çalakiya xwe ya heftane li Qada Galatasarayê ya li Beyoglûya Stenbolê lidar xistin û li aqûbeta xizmên xwe yên di binçavan de windabûyî pirsîn û daxwaza darizandina sûcdaran kirin. Di çalakiyê de ku gelek parêzvanên mafên mirovan û welatî beşdar bûn, wêneyên kesên di binçavan de windabûyî hatin hilgirtin.
Di çalakiya vê hefteyê de ji bo nûçegihanê rojnameya Ozgur Gundemê Ferhat Tepe ku di binçavan de bi êşkenceyê hat qetilkirin doza edaletê hat kirin.
Endama Komîsyona Windabûnên di Binçavan de ya Komeleya Mafên Mirovan (ÎHD) Zeynep Yildizê daxuyaniya çapemeniyê xwend. Zeynep Yildizê bi bîrxistina komîsyona ku di 5’ê Tebaxê de li meclisê hat avakirin, dest bi axaftina xwe kir û got: “Ger ev komîsyon, wekî ku Serokê Parlamentoyê Numan Kurtulmuş di axaftina xwe ya vekirinê de diyar kir, têgihîştinek temsîl dike ku tê de rastî nayê înkarkirin, hest nayên paşguhkirin û siyaset wêrekiya hilberandina çareseriyan nîşan dide, em, Dayikên/Mirovên Şemiyê, daxwaz dikin ku em werin guhdarîkirin. Ji ber ku hebûna Dayikên Şemiyê şahidiya xwînrijandina berdewam a bûyerên berê ye. Demokratîkbûna Tirkiyeyê tenê bi qebûlkirina vê rastiyê û naskirina êşa ku bûye sedema xwînrijandinê ne mimkun e. Ji bo vê yekê, divê pêşî deng û daxwazên kesên ku têne bêdengkirin werin bihîstin.”
Zeynep Yildiz ku diyar kir rojnamevan Ferhat Tepe yê 19 salî ku ji bo rojnameya Ozgur Gundemê dixebitî, 32 sal berê bi êşkenceyê hatiye qetilkirin û got ku Ferhat Tepe hewl dida ku dengê kesên ku mafên wan hatiye binpêkirin bide ragihandin. Zeynep Yildizê got: “Di 28’ê Tîrmeha 1993’an de, Ferhat li navenda bajarê Bedlîsê ji aliyê sê çekdaran ve hat revandin. Lê tevî daxwazên berdewam ên malbat û rojnameya ku ew lê dixebitî, hemû saziyên dewletê yên pêwendîdar girtina wî red kirin.
Piştî revandinê, kesekî telefonî malbata Ferhat Tepe kir û îdia kir ku Ferhat Tepe ji aliyê endamên Tugaya Tolhildanê ya Tirk ve hatiye revandin û divê bavê wî, Îshak Tepe, ji serokatiya DEP’ê ya BEdlîsê îstifa bike û ji bo serbestberdana lawê xwe milyarek TL pere bide. Îshak Tepe bi raya giştî re parve kir ku wî dengê kesê di telefonê de nas kiriye ku dengê Fermandarê Tugaya Tetwanê Korkmaz Tagma bûye ku vê dawiyê di civînekê de gef li wî xwaribû, nas kiriye.”
Zeynep Yildiz tekez kir ku Ferhat Tepe 13 roj piştî windabûna wî bi hovane hat êşkencekirin û mirî hat dîtin û diyar kir ku cenazeyê wî li Goristana Bêkesan a Xerpêtê hatiye dîtin. Zeynep Yildiz got, “Li gorî qeydên fermî, Ferhat li Gola Hezarê ku bi qasî 400 kîlometreyan dûrî cihê ku lê hatibû revandin, çûye avjeniyê. Lê ji ber ku nikarîbû avjeniyê bike, xeniqiye û ji hêla masîgiran ve hatiye dîtin. Lê belê, li ser cenazeyê Ferhat Tepe nîşanên êşkenceya giran hebûn. Wekî din, 14 şahid hebûn ku şahidiya revandina wî kirin û îfade dan ku wan şahidiya lêpirsîna wî ya di bin êşkenceyê de li Fermandariya Alaya Cendermeyan a Dîyarbekirê kirine. Tevî vê yekê, rêyên hiqûqî yên navxweyî bêencam man. Ji ber vê yekê, malbatê serî li DMMEyê da. DMMEyê di lêpirsîna Ferhat Tepe de “kêmasiyên ecêb” dît. Wê Türkiye mehkûm kir û dît ku hikûmetê, belge û şahidên pêwîst ji bo ronîkirina dozê asteng kiriye. Di serlêdana dawî ya malbatê de, Dadgeha Destûrî di 16’ê Hezîrana 2016’an de biryar da ku dozgeriya doza Ferhat Tepe talîmatên berbiçav ji bo berfirehkirina lêpirsînê nedaye, gavên ji bo zelalkirina dozê neavêtine avêtin û birara bipêkrina maf heye da. Lêbelê, ji ber ku dem zêde di ser dozê re derbasbibû dadgehê vekirina dozê ji nû ve asteng kir.”
Zeynep Yildiz got, “Di encamê de, wekî ku DMME’yê diyar kiriye, ‘berxwedana dadwerî ya bi zanebûn a li hember lêpirsînek bi bandor’ di qanûna navxweyî de heta roja îro berdewam kiriye. Pêvajoya dadwerî bûye sedema bêcezatiyê ji bo kesên ku Ferhat Tepe bi êşkenceyê kuştin û cenazeyê wî winda kirin. Di salvegera 32-an a windabûna Ferhat de, em careke din tekez dikin: Sîstemeke dadweriyê ya rastîn ne tenê sûcdaran ceza dike, lê di heman demê de pêşî li sûcên pêşerojê jî digire. Ji ber vê yekê, têkoşîna li dijî bêcezatiyê yek ji gavên herî girîng e ji bo bicihanîna edaletê. Çiqas sal derbas bibin jî, em ê dev ji daxwaza edaletê ji bo Ferhat Tepe û ji bo hemû kesên ku hatine windakirin bernedin.”
Çalakî bi danîna qurnefîlan li qadê bi dawî bû.
