Şandeya Îmraliyê ya DEM Partiyê ji Sirri Sureyya Onder, Pervîn Bûldan û Ahmet Turk pêk tê, bi Hevserokê Giştî yê HDP’ê yê berê Selahattîn Demîrtaş ê li Girtîgeha Tîpa F a Edîrneyê girtî ye re hevdîtin kir. Selahattin Demirtaş piştî hevdîtinê li ser hesabê xwe yê medyaya dijîtal de ev tişt got:
“Xwişk û birayên hêja, bi wesîleya serdana şandeya me ya Îmraliyê ya DEM Partiyê, silav û hezkirinên xwe pêşkêşî hemû kesî dikim. Ez spasiya şandeya me dikim ku bi fedekarî û cidiyeteke mezin xebata xwe didomîne, ez jî radigihînim ku baweriya min bi partiya me DEM Partiyê û bi taybetî birêz Abdullah Ocalan ê ku ji bo çareseriya demokratîk û aştiyê li Girava Îmraliyê di nava hewldanên mezin de ye, heye.
Mijara herî hesas a vê serdemê piştgiriyaraya giştî ye. Ji ber vê yekê zelalbûn pir girîng û pêwîst e. Girîng e ku şandeya me aliyên siyasî yên li Meclîsê agahdar bike û di rojên pêş de saziyên sivîl, derdorên siyasî û civakî agahdar bike. Her wiha girîng e ku zimanê aştiyê li hemû derdoran bi ser bikeve. Her kesê ku li ser van mijaran diaxive, divê ji gef, şantaj, heqaret û gotinên provokatîf dûr bisekine û li şûna ku li ser serketin û têkçûnê gotinên vala û bêwate biaxivin, li ser siberoja hevpar a ku her kes bi ser bikeve, biaxivin.
Her çi qasî bi israr xwe ji navkirina pêvajoyê dûr bixin jî, ji aliyê me ve ev pêvajo pêvajoya ‘Demokratîkbûn, Aştî û Xwişk û Biratiyê’ ye. Weke aktorên ku li ser bingehên demokratîk û aştiyane siyasetê dikin em dixwazin, daxwaz dikin û piştgiriyê didin bidawîkirina pêvçûn û tundiyê. Em diyar dikin ku ger şert û mercên birêz Ocalan pêk bên, di vê mijarê de însiyatîfê bigire em ê piştgiriyê bidin. Helbet însiyatîfa bangewaziyê bi wî re ye. Weke ku diyar kir ku berpirsyariya çêkirina bingeha qanûnî û siyasî ya bangewaziyê li ser milê hikûmet û parlamentoyê ye. Em di vê qonaxê de her cure piştgiriyê didin hewldanên aştiyê. Lê belê, yê ku vê bangê bike û muxatabê vê bangê ne em in. Weke siyasetmedar rol û mîsyona me xurtkirina bingeha aştiyê, cesaretê bidin aliyên aştiyêî teşwîq bikin û aştiyê hêsan bikin. Lê ji wê zêdetir berpirsiyariya me ya bingehîn ev e; ji bo demokrasî, azadî, wekhevî, edalet û mafên bingehîn ên mirovan têkoşîna aştiyane, sivîl û siyasî berfireh bikin. Divê êdî rê û derfetên vê têkoşînê bên vekirin da ku bingeha aştiyê bê xurtkirin. Em dixwazin vê mijarê bigihînin kesên eleqedar.
Divê her kes bizanibe ku li holê niyeta baş heye û amadekariyên bi vê niyeta baş tên kirin hene. Lê belê ji bo ku pêvajo misoger bibe, divê gavên berbiçav bi lez û bez bên avêtin. Ji bo jiholêrakirina nakokiyên ku bi salan e li van axan bûne sedema êş û azarên nediyar û hemû enerjiya welat xerc kirine û ji bo bidestxistina aştiya siyasî em amade ne her cure piştgiriyê bidin.
Lê ger rêya aştiya siyasî bi awayekî ku hemû rêyên têkoşîna ji bo aştiya civakî, yanî demokratîkbûn, wekhevî, edalet û azadiyê were vekirin, wê bi kêrî her kesî û welat were. Bi vî awayî piştgiriya civakî ya ji bo aştiya siyasî zêde dibe û bi qebûlkirina piraniya gel wê hemû provokasyon û hewldanên têkbirina wê vala derbikevin.
Dîsa di vê heyama krîtîk û dîrokî de însiyatîfên ji bo aştiyê girtine ser xwe di serî de birêz Serokkomar, birêz Devlet Bahçelî, birêz Ozgur Ozel û hemû serokên partiyan re spas dikim. Ez diyar dikim ku ji bilî berjewendiyên şexsî û hizbî, ji xurtkirina demokrasiyê ez ê bê dudilî piştgiriyê bidim hemû gavan.
Di dawiyê de ez dixwazim bi taybetî vê yekê destnîşan bikim; herî zêde rûyê Kurdan ber bi Tirkiyê ve ye. Ez di wê baweriyê de me ku ger aştî û demokrasiyeke xurt were avakirin em ê bi hev re ji vê pêvajoyê serketî derkevin. Ji bo vê yekê ez hêvî û daxwaz dikim ku Komara Tirkiyeyê berê xwe bide Kurdan û aştiyeke mezin û bi rûmet pêk bîne.
Careke din spasiya şandeya me dikim, silav û hezkirinên xwe yên germ pêşkêşî we hemûyan dikim û serketinê ji we re dixwazim.
Selahattin Demîrtaş 11’ê Çileya 2025’an Girtîgeha Edîrneyê.”
