Hevserokê Giştî yê DEM Partiyê Tuncer Bakirhan bal kişand ser nîqaşên li ser pirsgirêka Kurd, diyar kir ku CHP dikare di çareseriyê de roleke gelekî girîng bilîze û got, “Em bawerin ku wê rola xwe bilîze.”
Hevserokên Partiya Wekhevî û Demokrasiyê ya Gelan (DEM Partî) Tulay Hatîmogûllari û Tuncer Bakirhan bi Serokê Giştî yê Partiya Komarê ya Gel (CHP) Ozgur Ozel re hevdîtin pêk anîn.
Piştî hevdîtinê li Navenda Giştî ya CHP’ê civîna çapemeniyê ya hevpar hat lidarxistin.
Bakirhan diyar kir ku CHP partiya damezrîner a Tirkiyeyê ye û got, “Partiyeke xwedî rabirdû, kevneşopî û mîrateyeke gelekî kûr e. Di damezrandina Komara Tirkiyeyê de, Tirk, Kurd û gelên din kedên mezin dan, têkoşîneke dijwar dan û tifaq kirin. Parlamentoya 1920’an jixwe cihêreng bû û vê hevalbendiyê nîşan da. Hemû rengan di nav xwe de dihewand. Destûra Bingehîn a 1921’an jî ji bo vê tifaqa dîrokî xwedî girîngiyeke guncav bû. Lê bi demê re hem ew meclisa damezrîner, hem jî tifaqa dîrokî ya Kurd-Tirk û hem jî têgihiştina tevayî ya di Destûra Bingehîn 21’ê de hatin înkarkirin û redkirin. Pirsgirêk heya roja me ya îro maye, lê tu kes jê sûd wernegirtiye. Ji ber pirsgirêka Kurd a ku ev sedsal in nehatiye çareserkirin aborî û enerjiya welat ber bi kanalên din ve biherike.“
Bakirhan axaftina xwe wiha domand: “(…) CHP di çareseriya pirsgirêka Kurd de ne tenê bi axaftin û tevkariyê, bi zanîn û ezmûna xwe ya berê dikare roleke pir girîng bilîze. Em bawerin ku ew ê bilîze. Îro herdu partiyan li ser mijarên weke em çawa dikarin xalên hevpar zêde bikin û ji bo demokratîkbûna Tirkiyeyê bingehek demokratîk ava bikin rawestiyan. Bi nirx û girîng bû. Rojeva me ya din jî rojeva qeyûman bû. Qeyûm li Tirkiyeyê hêdî hêdî ber bi rejîmeke rêveberiyê ve diçe. Berê qeyûm tenê ji bo şaredariyên DEM Partiyê dihatin tayînkirin, niha qeyûm tayînî şaredariyên CHP’ê jî tên kirin.”
Bakirhan pirsa serlêdana wan a hevdîtina bi Rêber Apo re bersivand. Bakirhan anî ziman ku heta niha tu bersiv negirtine lê li benda bersiveke erênî ne.
‘EM AMADE NE ROLA XWE BILÎZIN’
Ozgur Ozel bertek nîşanî desteserkirina qeyûman da. Ozel axaftina xwe wiha domand: “Ez vê yekê careke din diyar dikim, divê pêvajo li ser bingeha lihevhatineke civakî ya zelal û jidil bimeşe, cihê ku ev pêvajo lê were meşandin divê Meclîsa Mezin a Tirkiyeyê be. Divê tu partî û beşên civakê neyên dûrxistin. Di avakirina lihevkirineke civakî de divê beşên civakê yên herî mexdûr li ber çavan bên girtin.
(…) Ger jidil û zelal tevbigerin, Tirkiye ev pirsgirêka 40 sal in çareser nekriye û bûye sedema ku gelek tiştan bi Tirkiyeyê bide windakirin, me hemûyan êş kişand û hem di aliyê manewî û hem jî di aliyê madî de gelek windahî hene, dikarin vê pêvajoyê veguherînin pêvajoya aştiya civakî. Ev wê fêdeyê bide hemû beşên Tirkiyeyê. Wê Tirkiyeyê di têkiliyên navneteweyî de ji gelek xetereyan rizgar bike. Di vî warî de ji roja ewilî heta niha di helwesta me de tiştek neguheriye. Em welatekî ku her kes lê bijîn, xwe wekhev bibîne û di nava vê wekheviyê de bijîn dixwazin Ji bo vê yekê em ji hemû gavan re amade ne.
Hêvîdarim ku hemû aliyên siyasî ku kes hevdu wêder neke û li ser bingeheke guncaw bi hev re diyalogê pêk bînin û pêvajoyeke bi qîmeta bê meşandin, bê jiyîn.”
