CENTCOM’ê diyar kir ku kesê navborî êrîşên li Sûriye û Iraqê plan dikir, bi şaneyên cuda yên DAÎŞ’ê re di nava têkiliyê de bû û hem li ser hêzên Dewletên Yekbûyî yên Emerîkayê (DYE) hem jî li ser koalîsyona navneteweyî yekser gef bû.
Hate ragihandin ku operasyon bi piştgiriya helîkopter û balafirên bê mirov hatiye kirin û serdegirtin ji aliyê leşkerên DYE’yê ve hatiye pêkanîn.
Fermandarê CENTCOM’ê Amîral Brad Cooper got, “Em ê li tevahiya herêmê bi biryardarî terorîstên DAÎŞ’ê bişopînin. Armanca me ew e ku rêxistinê bi rengekî mayinde têk bibin û xaka DYE’yê biparêzin.”
DYE’yê meha Tîrmehê jî li Idlibê operasyoneke bi heman rengî kiribû û berpirsyarekî payebilind ê rêxistinê û du kurên wî kuştibû.
Idlib ku li ser sînorê Tirkiyeyê ye, demeke dirêj e ji aliyê endamên DAÎŞ’ê ve weke herêmeke lê bistirê tê bikaranîn.
Hêzên DYE’yê sala 2019’an serçeteyê DAÎŞ’ê Ebû Bekir el Bexdadî li gundê Barîşa yê Idlibê, Ebû Îbrahîm el Haşîmî el Kûreyşî yê ku ketibû şûna Bexdadî jî sala 2022’an li gundê Atme di encama operasyonan de kuştibûn.
