Li bajarê Hesekê bi pêşengiya Kongra Star û Kombûna Jinan a Zenûbiya konferansa “Hevgirtina jinan bingeha avakirina edalet û demokrasiyê ye li Sûriyeya nenavendî û yekgirtî” hate lidarxistin, Jinên ku beşdarî konferansê bûn debarê avakirina Sûriyeya nû û siyaseta ku niha tê meşandin de ji ANF’ê re axivîn.
Hevseroka Giştî ya PYD’ê Perwîn Yusuf di despêka axaftina xwe de diyar kir ku girîng e ku partî û hemû jinên li hev kom bibin û nêrîna xwe ji bo Sûriyeyê parve bikin û got, “Ji ber ku li Sûriyeyê bi taybetî piştî rûxandina Rejîma Esed, ji her alî ve rojane guhertin û veguhertinên mezin çêdibin. Mînak nivîsandina destûreke nû, derxistina zagonên nû. Lê vîna jinê tê de nayê dîtin û naskirin. Ji ber ku hikumeteke li ser esasî nijadperestî û olperestî xwe daye avakirin. Li aliyê din ve hikumeta Şamê jinê weke hêz û hebûnekê nabîne û bi vî awayî dixwaze çarşefek reş li ser jinan belav bike.”
Di berdewamiya axaftina xwe de Perwîn da zanîn ku guhertinên ku li Sûriyeyê tên çêkirin nayên qebûlkirin û wiha domand: “Ji ber ku vîna me wek jin tê de nayê temsilkirin. Em guhertinên ku îro li Sûriyeyê tên kirin em qebûl nakin. Destûra ku hatiye nivîsandin hemû li gorî hebûna zilam hatiye nivîsandin. Herwiha ji bo hilbijartinên parlamentoyê ku dixwazin pêk bînin jin tenê ji sedî 20 tê de cih digire û kota li ser bajaran belav kirine, hebûna jinan li ber çavan negirtine. Ev hebûna jinê a tene ji sedî 20 temsil dike wê tenê şiklî be.”
Di dawiya axaftina xwe de Hevseroka giştî a PYD’ê Perwîn Yusuf wiha got, ‘’Şoreşa jinê a ku li Bakur û Rojhilatê Sûriyeyê pêk hatiye û gelê Sûriyê hemû naskiriye ku jinê vîna xwe di vê Şoreşê de dîtiye. Ji bo wê divê jin xwedî li destketiyên heyî yên ku hatine bi destxistine derkevin. Ji bo wê destûra ku were amadekirin divê bi vîna jinê were nivîsandin û hebûna jinê di hemû guhertinan de li pêş be.”
Seroka Ofîsa jin a Meclîsa Sûriyeya Demokratîk Cîhan Xidro jî helwesta xwe ji bo rewşa niha ya Sûriyeyê anî ziman û wiha got, “Ev kombûna jin a mezin di van rewşên ku li herêmê û Sûriyeyê tên jiyîn de girîngiyeke xwe mezin heye. Ruxmê hemû zor û zehmetiyên ku jin dikşîne lê dîsa jî hebûna xwe îsbat dike û dengê xwe bilind dike da ku di Sûriyeya nû cihê xwe bi awayek çalak bigire. Di nav guhertinên siyasî yên ku di Sûriyeyê de rûdan û bi taybet piştî rûxandina rejîma Baasê, gavên ku Hikumeta Veguhêz a Şamê avêtine ji konferansa niştîmanî ya Sûriyeyê bigire û heta bi ragihandina destûra Sûriyeya nû û gelek bûyerên din ên ku diqewimin, jin ji hemû pêkhateyên Sûriyeyê hatine piştguhkirin.”
Cîhan Xidro anî ziman ku eger rengê jinê di Sûriyeyê de dernekeve pêş wê çareserî jî nebe û got, ‘’Em îro dengê xwe bilind dikin û dibêjin bêyî hebûna jinê û pêkhateyên Sûriyeyê wê Sûriyeya nû û rast neyê avakirin. Sûriyeya layîqî sîstema ne navendî û pir rengî ye. Ji bo wê kombûna me ji bo Hikumeta Veguhêz a Şamê û dewletên herêmê peyamek e. Îro pêşeroja Sûriyeyê di nav rewşên zehmet de ye û divê maseya hevdîtinê hebe. Em weke gelê Sûriyeyê ev 14 sal in di encama şer û aloziya li Sûriyeyê qewimiye, berdêlên da. Bêyî ku maseyeke Sûriye-Sûriyeyî tine be û jin di nav cih negire wê li Sûriyeyê çareserî pêk neyê.”
