Însiyatîfa Iraqî ya Azadiya Ocalan, têkildarî Banga Dîrokî ya 27’ê Sibatê ya Rêber Apo daxuyaniyek da.
Di daxuyanê de wiha hate gotin: “Tişta ku di vê nameyê de hatiye gotin, banga fesihkirina Partiya Karkerên Kurdistanê, danîna çekan û têkoşîna siyasî ye. Guherînên lezgîn ên çêdibin, li hemû aliyan ferz dike ku siyasetên xwe di ber çavan re derbas bikin.
Piştî ku Rêber Ocalan peyama aştî û hezkirina di navbera civakan de ragihand, êdî tu hinceteke Erdogan nemaye ku hêzên wî li Iraqê hebin û divê rayedarên Tirkiyeyê hemû hêzên xwe yên leşkerî ji bakurê Iraqê vekişînin. Heman tişt ji bo Sûriyeyê jî derbas dibe. Divê Tirkiye rêzê li serweriya welatên cîran bigire û daxwazên aştiyê yên birêz Ocalan pêk bîne û ji bo çareseriya pirsgirêka Kurd ji çareseriya leşkerî dûr bikeve.”
Însiyatîfê her wiha daxuyaniyên Wezareta Karên Derve ya Iraqê û daxuyaniyên serokê Herêma Kurdistanê ku piştevaniya banga Rêber Apo dikin, erênî nirxandin.
Însiyatîfê di dawiya daxuyaniya xwe de bang li berpirsên Tirkiyeyê kir û wiha ragihand: “Bersiva banga Rêber Ocalan bidin û zemîna qanûnî û siyasî ji bo vê yekê peyda bikin û derfeta pêkanîna aştiyê di navbera gelên Kurd û Tirk de ji dest bernedin. Ji ber ku ev yek rasterast bandorên erênî li ser Iraq û welatên cîran bi giştî dike.”
