Egîd Roj kesekî dilwêrek, hêzkiriyê welatê xwe, bi armanca rizgarkirina welatê xwe bû û di di kêliyên herî zehmet û biêş de jî di asta herî bilind de li ber xwe da û hêz û moral da derdora xwe. Di awirên wî de tolhildana welat û rêhavelên xwe û hêviyên rizgarkirin bajarê wî dihate dîtin. Di oxira ragihandina rastî û tolhilanîna havelên xwe, her tim di çeperên şer û xetên herî pêş de cih digirt.
Di wan şevên giran de li ber ronahiya heyvê di wan çeperan de bi hêviyên serkeftin û azadiyê bi şervanan re rastî û lîstokên dijmin eşkere dikir, di vê xeta rastiyê de tu carî gotina westandinê ji devê wî dernediket. Li ser rûyê wî moral û coş tim dihate dîtin. Kenê wî her li ser rûyê wî bû.
Êş û azarên gelê xwe vedigerand tolhildanê û bi wê sozê careke din ji nav gelê xwe berê xwe dida çeperên şer. Eger em biçin ji wan zinar, kevir û darên zeytûnên Efrînê bipirsin wê ew ê jî ji me re behsa şoreşgertiya wî û çîroka doza wî bikin.
Ev kes Rojnemevan Egîd Roj bû ku bi gotina xwe ya: “Ez ne tenê rojnemevan im, ez ji dîrokê re şahîdiyê dikim.” Bi rêya têkoşîn û berxewedana xwe bi ser xist. Lê Egîd ne tenê şahîdiya dîrokê gelê xwe kir, di heman demê de dîroka gelê xwe bi qehremantiya xwe da xemilandin.
Çawa ku êrîş û dagirkeriya dewleta Tirk a li ser Efrîn û gelê Efrînê qebûl nekir û her li hemberî wê bi her awayî têkoşiya û li ber xwe da, her wiha li Bendava Tişrînê jî êrîş û hovîtiya dewleta Tirk a li ser gel û şervanan qebûl nekir, berê xwe da wir û li ber xwe da. Egîd bû perçeyek çîroka wan.
Nûçegihana Ronahî TV’yê Hêvîdar Heranî ku di sala 2019’an de Şehîd Egîd Roj nas kiriye û li Bendava Tişrînê li gel Egîd şahidiya kêliyên berxwedanê kiriye, qala Şehîd Egîd Roj. Hêvîdar di destpêka axaftina xwe de sersaxî ji malbat û rêhevalên Şehîd Egîd Roj re xwest û bi van gotinan qala kesayet û nêzîkatiyên Şehîd Egîd kir: “Keda Şehîd Egîd ya di berxwedan û tekoşînê de gelek e. Li gel destpêka Şoreşa Rojava cihê xwe di nava xebatên çepemeniyê de girt. Her çiqas zextek mezin li ser hebû jî dilsozî, dilnizmî û coşa wî her tim li rûyê wî bû. Gelekî ji karê xwe hez dikir. Her tim di nava gel de bi karê xwe re mijûl dibû.”
Hêvîdar Heranî di berdewamiya axaftina xwe de diyar kir ku Şehîd Egîd her tim li kêleka gel û şervanan bû û wiha got: “Şehîd Egîd bi salan di nava gel û şervanan de kar kir. Di kêliyên berxwedanê ên herî zehmet de jî cih girtiye. Mezintîrîn aciziya wî dagirkirina bajarê wî bû ku her digot ez tu carî dev ji vê dozê bernadim. Dema ku birîndar çêdibûn Egîd weke hevalekî li kêleka wan birîndaran disekinî û di her kêliyê de digot ku ka werin em govendeke Efrînkî û Kobanî bigerînin.”
Hevîdar Heranî di dawiya axaftina xwe de got ku Egîd tim ji bo ragihandina rastiya gel û şervanan li ber xwe da û got: “Em êrîşên dewleta Tirk û hedefgirtina rojnamevanan şermezar dikin. Egîd tim ji bo ragihandina rastiya gel û şervanan li ber xwe da. Çend sal derbas bibin jî em ê her li pey xeta Şehîd Egîd, Şehîd Cîhan, Şehîd Nazim û Şehîd Dilîşan bin. Egîd di dilê me de wê her cihê hêzê be. Her wiha em soz didin hevalê xwe Egîd ku em ê xebatên xwe mezintir bikin, em ê heta dawiyê li pey şopa heqîqetê bin û rêya Egîdan, Naziman û Cîhanan bişopînin.”
