Li wîlayeta Kunarê ku hilweşîna herî mezin li wir bû, hîn jî mirov di binê xirbeyan de ne. Ji ber hezazê xwegihandina gelek gund û gundikan zehmet dibe.
Rêveberiya Talîbanê ragihand ku di nava du rojên dawî de bi 155 seferên balafiran nêzî 2.000 birîndar gihand nexweşxaneyê, lê belê plana stargeh û jinûve avakirinê ya ji bo erdhejzedeyan eşkere nekir.
Li gelek gundan kon nehatin vedan, her wiha hin ji tîmên alîkariyê ji ber ku derfetên çûyînê nebû neçar man bi saetan bimeşin û xwe bigihînin cihê erdhejê.
Neteweyên Yekbûyî diyar kir ku erdhejê bandor li sed hezaran mirovî kiriye, banga alîkariya lezgîn kir û fonek ji 5 milyon dolarî veqetand. Lê belê ji ber kêmaniya alîkariya navneteweyî operasyonên mirovî yên li qadê jî kêm dimînin.
Rêxistina Tenduristiyê ya Cîhanê diyar kir ku ji bo destwerdana lezgîn pêwîstî bi 3 milyon dolarî heye, lê belê ev çavkanî nehatiye peydakirin û li ser rîska nexweşiyên şewbê hişyarî da.
Efganistan li rêzeçiyayên Hindukuş e ku plakayên tektonîk ên Avrasya û Hint lê digihêjin hev, lewma gelek caran erd lê diheje. Sala 2023’an li wîlayeta Heratê di erdheja bi 6.3 pileyî de hezar û 500 kes miribûn, 63 hezar xanî hilweşiya bûn.
