Platforma Ked û Demokrasiyê ya Amedê û Platforma Tenduristiyê ya Amedê, li dijî êrîşên dewleta Tirk a dagirker ên li ser Bendava Tişrînê û sivîlan, daxuyanî dan.
Endamên her du platforman li ber AZC Plaza ya li navçeya Yenîşehîr, hatin ba hev. Pankarta “Êrîşên li dijî sivîlan, xebatkarên tenduristiyê û ambûlansan, sûcê mirovahiyê ye” hate vekirin.
Endamê Platforma Ked û Demokrasiyê Mustafa Mesut Kaya nerazîbûn nîşanî êrîşên li Tişrînê li dijî xebatkarên tenduristiyê û sivîlan tên kirin, da û anî ziman ku ev yek bi eşkere binpêkirina hiqûqa navneteweyî ye.
Kaya bi bîr xist ku di êrîşên ji 8’ê Çileyê ve dewam dikin de, 21 sivîl hatine qetilkirin û 203 kes birîndar bûne.
Kaya pirsî ku gelo tişta li Xezeyê sûc tê dîtin, çawa li Tişrînê rewa tê dîtin û destnîşan kir ku AKP hiqûa navneteweyî tenê li ser esasê berjewendiyên xwe bi kar tîne, ev yek nayê qebûlkirin.
Kaya ev tişt jî bilêv kir: “Li welêt çareserî tê nîqaşkirin, li aliyê din jî hem siyaseta qeyim tê meşandin, hem daxwazên statuya mirovên li kêleka me tenê ji ber Kurdbûnê tên redkirin û bombe li ser tên barandin. Ev yek baweriya ji pêvajoyê re lewaz dike.”
Kaya got, “Nabe ku ti kes êrîşî xizmetên tenduristiyê bike. Weke saziyên tenduristiyê, rêxistinên ked û demokrasiyê yên li Amedê em car din bang dikin: Divê ev êrîş bên rawestandin, berpirsyar hesab bidin.”
Daxuyanî bi berzkirina dirûşmeyên “Destên li dijî xebatkarên tenduristiyê tên dirêjkirin, bila bişkên” û “Bijî berxwedana Tişrînê” bi dawî bû.
