Li Erzînganê Newroz bi dirûşma “Newroza Azadî û Yekîtiya Demokratîk” hate pîrozkirin. Nûnerên partiyên siyasî û rêxistinên civakî yên sivîl jî di nav de gelek kes beşdarî pîrozbahiyê bûn. Li qada pîrozbahiyê pankarta bi nivîsa “Demokrasî li welêt, aştî li herêmê” hate hildan. Çalakiya Newrozê bi deqeyeke rêzgirtinê ya ji bo bîranîna cangoriyên têkoşîna demokrasî û azadiyê destpê kir.
Endamê Desteya Rêveberiya Navendî ya Partiya Kedê (EMEP) Orhan Kûrûl destpêkê axivî û destnîşan kir ku pirsgirêka Kurd pirsgirêkeke sed salî ye ku divê li ser bingeha mafên wekhev bê çareserkirin. Ji bo vê jî işaret bi girîngiya mezinkirina têkoşînê kir û got, “Çawa ku me qadên Newrozê qezenç kirin, divê em têkoşînê mezin bikin û li ser piyan bihêlin.”
Parlamenterê Stenbolê yê Partiya Demokrasî û Wekheviyê ya Gelan (DEM Partî) Celal Firat jî bal kişand ser Pêvajoya Aştî û Civaka Demokratîk û cejn li her kesî pîroz kir.
Firat diyar kir ku divê gel li dijî zilmê dest bide hev û got, “Çawa ku hesin di nava êgir de nerm dibe, zilm jî bi piştevaniyê dihele. Silav ji Kawayê Hesinkar re ku serî li ber zaliman rakir. Divê em hemû parekê ji vê berxwedanê werbigirin. Eger em dixwazin hezkirin li vê erdnîgariyê serwer be, em neçar in tevkariyê li vê pêvajoyê bikin.”
Parlamentera Dersimê Ayten Kordû jî ragihand ku Newroz ji bo wan tê wateya berxwedana li dijî zilmê û got, “Di vê pêvajoya dîrokî de em di serdemeke welê de ne ku têkoşîna civaka demokratîk bi hev re bimeşînin û bi hev re aştiyê bînin vî welatî.”
Ayten Kordû anî ziman ku pêşvebirina têkoşîna demokratîk hêsan nîne û got, “Lê belê em di vê de israr dikin: Aştî mafê vê xakê ye. Li vê xakê aştî û civaka demokratîk tê avakirin, desthilatdariya heyî ya siyasî û mejiyê dewletê jî neçar re bi zilma re xwe re rûbirû bibe. Lewma agirê Newrozê agirê azadî û demokrasiyê ye. Gel wê aştiyê diyarî vî welatî bike.”
Piştî axaftinan agirê Newrozê bi pêşengiya ciwanan hate dadan. Beşdaran piştre li ber stranên Hasan Alî Sezer govend gerand.
