Li Mersînê di êrîşeke li ser kafeyê de Sedat Ersoy ê 24 salî û jinek ku navê wê nehate hînbûn jiyana xwe ji dest dan, zarokekî 17 salî bi giranî birîndar bû. Ersoy ku di dema êrîşê de bi tesadufî li kafeyê bû, bi fîşeka li serî ketî, li cihê bûyerê jiyana xwe ji dest da. Eşkere bû ku bûyer şerê navbera çeteyên narkotîkê bû û emniyet jî di nav de bû.
DI ÊRÎŞÊ DE 2 KESAN JIYANA XWE JI DEST DAN
Bavê Ersoy Zîrve Ersoy qala bûyerê kir û xwest berpirsyar bê girtin. Zîrve Ersoy ragihand ku emniyet jî di nav bûyerê de ye û got, “Kurê min tevî pismamê xwe çû li wesayita firotinê ya xwediyê kafeyê binihêre. Komek hebû ku neyarê xwediyê kafeyê bû. Dema ku kurê min û biraziyê min diketin hundirê kafeyê, êrîş hate kirin. 10 deqe beriya êrîşê polîs hatin kafeyê û li ser xwediyê kafeyê geriyan. Beriya ku polîs bên li xwediyê kafeyê tê gerîn û jê re tê gotin ku wê polîs bê. Li ser vê agahiyê, çekên xwe yên li kafeyê derdixînin. Piştî ku polîs tên, li cih lêgerînê dikin û tiştekî nabînin. 5-10 deqe piştî çûyîna polîsan êrîşa çekdarî rû dide. Kurê min bi fîşeka li serî ketî jiyana xwe ji dest da. Jinek ku li derveyî kafeyê di rê de dimeşiya bi giranî birîndar bû û li nexweşxaneyê jiyana xwe ji dest da.”
BIRYARA NEPENÎTIYÊ LI SER DOSYAYÊ DANÎN
Ersoy diyar kir ku êrîş hesabpirsîna nava çeteyan bû û got, “Di encama vê yekê de kurê min jiyana xwe ji dest da. Ji roja ku bûyer bû û pê ve gelek caran lêpirsîn hate kirin, lê sûcdar nehatin girtin.”
Ersoy got, “Em ji Mîdyatê ya Mêrdînê beriya bi salan hatin vê derê. Min bi gelekî zor û zehmetiyan zarokên xwe mezin kir. Kurê min hefteyek beriya ku bimire, bûbû bav. Pitikê hefteyekê bêbav hiştin hesab ji wan nayê pirsîn. 15 roj beriya êrîşê li kolanê malek kirê kiribûn, ev êrîşkar bi taybetî ji Stenbolê hatin anîn. Gelek caran çûn kafeyê û bufeya li kêlekê, xwediyê kafeyê li derveyî bajêr bû û roja êrîşê vegeriya bû Mersînê. Çawa ku dîtin vegeriya ye, destpêkê polîs şandin cihê bûyerê, lêgerîn kirin û piştre jî êrîş kirin. Biryara nepenîtiyê li ser dosyayê hatiye danîn. Hûn çi ji kê vedişêrin? Kujerên zarokê min bi dilrehetî digerin, vegeriyane Stenbolê. Eger em karin van hemûyan hîn bibin, çawa dewlet hîn nabe, çawa nikare van agahiyan werbigire?”
WELAT BÛYE MÎNA MAFYAYÊ
Ersoy pirsa ‘Em li welatekî çawa ne?’ pirsî û anî ziman ku kurê wî di şerê navbera çeteyan de hate kuştin. Ersoy got, “Êrîşkar sê, çar kes bûn. Bi du wesayitan hatin û reşandin. Piştî bûyerê wesayita bi marka Aûdî li otobanê şewitandin. Wesayita din a bi marka Mercedesê jî li Mezîtliyê li qadeke vala hiştin. Piştre li taksiyê digerin û bi çar taksiyên bazirganiyê diçin Zeyntînbûrnû ya Stenbolê. Taksîkar hatin binçavkirin û di îfadeya xwe de got, wan bi du wesayitan êrîşkar birin, du wesayit jî parastina wan kirin. Taksîkaran 2 milyon TL wergirtin. Welat bûye mîna mafyayê. Welat jî di nav de ye. Ji bo pere qezenç bikin her karî êdî dikin. Gelo jiyana mirovan ewqasî bêqîmet bûye? Qîmetê kesên hatine kuştin qet nîne? 2 mirovên bêguneh mirin. Eger dewlet ya pêwîst neke ez ê bikim. Heta ku hesab ji kujeran nepirsim ez ê dest ji vê bûyerê bernedim. Di kameraya ewlekariyê de dîmenê êrîşkaran heye, nasnameya wan diyar e, lê belê hîn nehatine girtin. Eger ev ne hevkarî be, hingî çi ye? Kurê min bû qurbanê çeteyên narkotîkê.”
