Navenda Ragihandin û Çapemeniyê ya HPG’ê (HPG-NRÇ) bi daxuyaniyekê nasnameya pênc şoreşger û endamên ragihandina azad ku di dem û cihên cuda de şehîd bûne eşkere kir. Derbarê jiyan û têkoşîna van her pênc kedkarên ragihandina azad me bi rojnamevan Egîd Sîrwan re hevpeyvîn kir.
Rojnamevan Egîd Sîrwan anî ziman ku her pênc şoreşger jî bi xebat û berhemên xwe bûne hafizaya şer û berxwedena gerîla. Her şoreşgerê ku pê re mayî û jiyan kirî yek bi yek behsa wan kir û got, ew bûne ziman û çavê gerîlayên azadiya Kurdistanê.
Egîd Sîrwan di axaftina xwe de wiha qala wan şoreşgeran kir:
“Di serî de her pênc endamên ragihandinê bi rêzdarî bi bîr tînim û bejna xwe li hember wan ditewînim. Rastî jî her pênc heval Şîlan Ezgî, Aso Baran, Tufan Sefqan, Firat Tolhildan û Azad Serxwebûn, di xebatê ragihandinê de cihekî xwe yê girîng hene. Ango di pêşxistina xebatên ragihandina çiya de pêşengî kirin, têkoşîn kirin, ked dan û bi awayê herî baş xwestin ku fikra Apoyî, jiyan û têkoşîna gerîla, têkoşîna azadiya Kurdistanê bi awayekî baş biteyîsînin çavê her kesî. Ango bibin ziman û çavê gerîlayên Kurdistanê. Xwestin vê bi awayekî baş, pisporane û şoreşgerane bidin meşandin. Mirov dikare ji bo her pênc hevalan wiha bîne ziman.
Weke endamekî ragihandina azad min heval Tufan, Azad û Firat dîtibûn. Dixwazim jibo wan hinek tiştan bêjim. Her sê heval jî me sala 2017’an nas kir. Ji xwe her sê heval bi fermandar Elî Kanîroj re ku fermandarê ragihandin û çapemeniya HPG’ê bû, xebat dane meşandin. Bi rastî jî her sê heval jî bi eşqekî pir mezin, xwestekî zêde û bi berpirsyariyekî ciddî nêzî xebatê ragihandinê dibûn. Her sê heval kedên pir mezin dan. Li Herêmên Parastinê yên Medyayê, li qadên şer man, têkoşîn dan meşandin, wekî endamên ragihandinê xebat dane meşandin. Bûn hafizeyek ji têkoşîna gerîla, hem bixwe hem jî bi xebat û berhemên xwe bûn hafizeya şer û berxwedaniya gerîla. Her sê heval jî bi rastî hem di qelem û hem jî di kameramantiya xwe de pir li pêş bûn. Ango karê xwe pir ciddî digirtin û bi rastî jî di vê xebatê de bi hêz bûn.”
Egîd Sîrwan ji bo şehîd Tufan Dersîm jî ev tişt anî ziman:
“Heval Tufan eslê xwe ji gundê Axdat ê girêdayî Dersîmê ye. Di malbatekî ji eşîra Ebbasan mezin dibe, jixwe navê şoreşgerekî bi navê Ulaş li heval Tufan tê kirin. Bi xwe jî pir qala wan dikir. Piştre zanîngeh dixwîne, ango însanekî xwendî û zane ye. Bi vî awayî tevlî tevgera azadiyê dibe. Heval Tufan di têkoşîna xwe de salên pir dirêj gerîlatî kiriye, bi taybet li qadên Zagros û Avaşîn tevlî çalakiyan bûye, çend caran birîndar bûye, taybet di şerê gel ê şoreşgerî de yek ji wan gerîlayan bû ku tevlî çalakiyan bûye û rol lîstiye. Fermandarên wekî Reşîd Serdar û Nureddîn Sofî dîtiye û şervanê van fermandaran bûye. Heval Tufan qet negot ez fermandarê gerîla me ez ê çawa xebatê ragihandinê bikim. Pir bi dilnizmî tevlî vê xebatê bû. Û bi vî şêwazî jî xwest xwe pêş bixe. Bi rastî jî di vê karî de xwe kir endamekî pispor ê ragihandinê. Yê kû ji rêhevalê xwe re pêşengî bike û bikaribe berpirsyartiya vê xebatê rake. Heval Tufan bi vî awayî nêzî xebatê ragihandinê dibû. Li gelek herêman geriya, berhem û arşîva têkoşîna gerîla kom kir û kir malê dîrokê. Mijarekî din ku dixwazim bal bikişînim ser, heval Tufan berê jî di qadên gerîla de di çalakiyan de birîndar bibû. Lê Tîrmeha sala 2018’an dema li ser çapemeniya HPG’ê êrîş çêbû, heval Tufan bixwe li wir bû. Dema heval Elî Kanîroj, Helgurt û Xemgîn şehîd ketin, heval Tufan jî li wir birîndar bû û lingê wî şikest. Em bûn şahide vê buyerê. Demekî tedawiya xwe dît, piştre dîsa bêyî ku bêje ez birîndar im û bi awayekî neyînî ji ber êrîşan bandor bûme, bi xwestekekî ji berê zêdetir û bi kîn û nefretekî mezin vegeriya ser karê xwe û xwest ku tola hevalên xwe rabike. Û rastiya êrîşên qirkeriyê nişan bide. Ruxmê kû heval Tufan di aliyê fîzîkî de pir zehmetî dikişand dîsa jî li Herêmên Parastinê yên Medyayê di wan pêvajoyên zehmet de qet rojekî jî ji xwe re nekir asteng. Heval Tufan te ji kîjan rêhevalê/a wî pirs kiriba, bi kedkar bûyîna xwe ve dihat nas kirin û xwe di dilê hevalên xwe de bi cih dikir. Û bi rastî jî yek ji wan hevalan bû ku pir karên girîng, pir berhemên dîrokî û pir xebatên mayînde ji bo xebatê ragihandinê kir. Yek ji xebatên wî yê dawiyê ku bi rastî bi eşqekî mezin pê re mijûl bû, portreya fermandar Elî Piling bû kû bixwe amadekariya wê kir.”
Egîd Sîrwan li ser kesayeta Firat Tolhildan jî ev nirxandin kir:
“Heval Firat Tolhildan jî, yek ji wan hevalan bû ku me sala 2017’an di xebatên ragihandinê de dît. Dema me heval Firat dît, heval nû perwerde dîtibû û ji akademiya ragihandinê ya Gûrbettellî Ersoz derdiket û dihat Navenda Ragihandin û Çapemeniya HPG’ê. Heval Firat bi rûkenî û bi rûgeşiya xwe pir zû bal dikişand û pir zêde germ bû di jiyanê de. Pir bi kelecan bû di jiyanê de. Çend taybetmendiyên wî yên pir xweş jî hebûn. Pir cidî bû di karê xwe de. Heval Firat di karê xwe de pir bi disiplîn, pir cidî nêz dibû. Pir bi xwestekên mezin dixwest pêş bikeve. Ez ji bo heval Firat çend mînakan bidim. Di hemû xebatên xwe yên ragihandinê de, qala xebatên ragihandinê, gerîla û têkoşîna gerîla dikir. Teqez di nav axaftinên wî de navê heval Xelîl Dag derbas dibû. Her tim ji çend hevokên wî navê heval Xelîl derbas dibû. Heval firat pir ji heval Xelîl Dag hez dikir, pir jê bandor bibû û dixwest wek heval Xelîl Dag di qada ragihandinê de û di têkoşîna gerîla de yan jî li çiyayên Kurdistanê ku bikaribe sînema û ragihandinê pêş bixe, ji bo xebatên baş ên mayînde bike, pir bi xwestek bû. Her tim qala wê tiştê dikir. Bi rastî jî wekî heval Xelîl Dag bi cidiyet bû, zêde bi mereq bû. Dema te bigota ev nabe, wî digot na ev dibe û li cem wî tu carî gotina ‘derfet nîne’ nîn bû. Heval Firat dikaribû hemû astengiyan derbas bike. Dixwest vî karî pêş bixe û di vê karê de berpirsiyartî rabike. Pir dixwest biçe cihên zehmet ên wek Zagrosan, Avaşînan herî dawî jî çû ku kar bimeşîne, jixwe heval li wir jî şehîd ket. Di heval Firat de tiştekî din jî hebû. Hevalên ku wî nas dikir, pirs kiriba heval Firat çawa ye. Digotin em newêrin jiber heval Firat tevbigerin, ji ber em çi dikin heval Firat hema dikişîne kamerayê. Dixwest hemû kêliyê gerîla yên zehmet, xweş bi awayekî baş qeyd bike û bike malê dîrokê. Mirovên wekî heval Firat dihêle kû xebat û têkoşîna gerîla baştir biteyîse civakê. Heval Firat dixwest bi qelem û kameraya xwe, bibe çav û zimanê gerîla.”
Egîd Sîrwan jiyan û têkoşîna Azad Serxwebûn wiha vegot:
“Heval Azad jî yek ji wan hevalan bû kû bi taybet li qada Zagrosê xebat daye meşandin. Heval Azad salên 2016-17’an li eyaleta Avaşînê bi kameraya xwe tevlî gelek çalekiyan bû. Yek ji wan çalakiyan jî çalakiya li ser qereqola Rubarok bû. Di heman demê hevalên kû li wê qadê bi heval Azad re mabûn ji heval Azad pir hez dikirin. Di jiyana xwe de pir rûken û dilnizm bû, di hevaltiya xwe de pir samîmî bû. Ji xebatên ragihandinê hez dikir û nûçegihanekî xurt bû. Ew jî ruxmê ku di warê tenduristî de zehmetî dikişand, dîsa jî li herêmên weke Avaşîn û Zagros xebat meşand.”
Egîd Sîrwan wiha dawî li axaftina xwe anî:
“Xebatên ku niha weke arşîva gerîla hene yan jî weke berhemên ku em niha di medyayan de dîbînin, ev hemû keda heval Şîlan, Aso, Tufan, Firat û Azad e. Xebatên ku em niha di ragihandinê de dimeşînin hemû bi saya van hevalan e. Her pênc heval bi qelem, têkoşîn, kesayet, gerîlatî û kameramantiya xwe weke endamekî ragihandinê ji bo me bûn pêşeng. Em ê bi sond û gotinên wan tevlî xebatê ragihandina azad bibin û pêş bixin. Û em ê her tim li ser şopa wan bimeşin, hewl bidin vê xebatê bi awayekî rast pêşde bibin û berhemên mayînde yê ku layîqê keda wan be pêş bixin.”
