Endama Însiyatîfa Azadiya Rêber Apo ya Sûriyeyê Eyşe Efendî, di salvegera 27’emîn a Komploya Navneteweyî ya 9’ê Cotmehê de ji ANF’ê re axivî û diyar kir ku armanca komplo û polîtîkayên tecrîdê yên ku bi salane tê meşandin, şikandina vîna gelan e. Eyşe Efendî, destnîşan kir ku, gelê Kurd di vê pêvajoyê de bêhtir hişyar û bi rêxistin bûye û got, “Komplo hat têkbirin, fikrên Rêber Apo îro îlhamê dide mîlyonan.” Eyşe Efendî, berxwedana li Îmraliyê weke “Akademiya Zanist û Felsefeyê” pênase kir û diyar kir ku bi paradîgmaya demokratîk, ekolojîk û azadiya jinê ya ji aliyê Rêber Apo ve hatiye pêşxistin, feraseteke nû ya jiyanê pêş xistiye.
Eyşe Efendî got, “Komplo bi pêkanîna tecrîd di nava tecrîdê de hat berdewamkirin. Di gelek şoreşan de gel rabûne, rêber û pêşengên wan hatine girtin an jî tinekirin. Piştî wê gelê wê bi qirkirin û komkujiyan re tine kirine. Lê gelê Kurd teslîm nebû. Bi girtina Rêber Apo re bi mîlyonan kes daketin qadan, çalakî hatin lidarxistin, grevên birçîbûnê hatin destpêkirin û ev têkoşîn hê jî dewam dike.”
Eyşe Efendî, da xuyakirin ku gelên li çar aliyê cîhanê xwedî li Rêber Apo derdikevin û wiha domand, “Rêber Apo ne bi tenê ye; hem mafên xwe û hem jî mafên gelê Kurd parast. Îro Îmralî veguheriye akademiya zanist û felsefeyê. Îro dema em manîfestoya civaka aştî û demokratîk dixwînin, em fîlozofê nûjen tê de dibînin. Paradîgmaya demokratîk, ekolojîk û azadiya jinê ya ku Rêber Apo pêş xistiye, feraseteke nû dide mirovahiyê.”
Eyşe Efendî, diyar kir ku desthilatdariyên heyî ji fikrên Rêber Apo ditirsin û got, “Kapîtalîzm xitimiye. Hêzên ku ji fikra çareseriyê ya Rêber Apo ditirsin, dixwazin gelan bikin xizmetkar. Lê belê azadiya rasteqîn di fikra Rêber Apo de derketiye holê.”
Eyşe Efendî, di dawiyê de anî ziman ku hêzên herêmî li Rojhilata Navîn hewl dan planên xwe yên berjewendiyê pêk tînin, lê Rêber Apo bi têk birina komployê re vê planê jî hilweşandiye û wiha got, “Fikrên wî bandor li hemû cîhanê kir. Weke gel me li ber xwe da, me serî netewand û em bi ser ket in. Kurdan li çar parçeyan li ber xwe da. Îro em bi ser ketin û em ê her bi ser bikevin.”
