Festîvala Şano ya Amedê ya 10’emîn bi hevkariya Şanoyên Bajar a Şaredariya Bajarê Mezin a Amedê û Şanoya Bajar a Amedê di 25’ê Nîsanê de bi dirûşma ‘Çiraya me geş dibe’ destpê dike.
Festîval wê bi performanseke dansê destpê bike û bi giştî 11 lîstik bêne pêşkêşkirin. Di bernameyê de lîstikek bi Ermenî, 4 lîstikên bi Soranî, 6 lîstikên bi Kurmancî û 4 lîstikên bi Tirkî hene. Ji Rojhilat û Başûr jî wê komên şano tevlî festîvalê bibin.
Festîvala ku wê heta 4’ê Gulanê dewam bike, bi naveroka xwe ya pirçandî û pirzimanî balê dikişîne. Festîvala Şano ya Amedê 10 sal in derdikeve pêşberî hunerhezan.
KOMA ERMEN JÎ WÊ DERKEVE SER DIKÊ
Di şeva destpêkê ya festîvalê de wê ji bo bîranîna şanogerê Kurd Bavê Teyar ku 18’ê Çileyê li nêzî Bendava Tişrînê ya li Bakur û Rojhilatê Sûriyeyê di encama êrişa hewayî de birîndar bû û 19’ê Çileyê jiyana xwe ji dest da, sînevîzyon wê bê nîşandan û performansa bi navê ‘Palma’ bê pêşkêşkirin.
Ji Rojhilatê Kurdistanê jî komên şano yên Akademiya Hunerê (Sine) û Bertevg a Kargeha Şanûya Hûman (Seqiz) tevlî festîvalê bibin. Her wiha îsal yekemcar koma şano ya Ermenî Hangartz wê di festîvalê de derkeve ser dikê. Komên şano yên Moda Sahne, Îstanbûl Împro, Adam Tiyatro û BGST Tiyatro lîstikên xwe yên bi Tirkî nîşan bidin.
Lîstikvana Şano ya Bajarê Amedê Şîlan Alagoz anî ziman ku li gel astengî û zehmetiyan jî festîval bi salan hatiye dewamkirin û bang li gel kir ku beşdarî festîvalê bibe.
Şîlan Alagoz diyar kir ku festîval bi saya taybetmendiya xwe ya pirzimanî çandan digihîne hev û festîvala ku 10 sal in dewam dike hem ji bo wan hem jî ji bo bajêr nirxekî gelekî cuda ye.
Şanoger Şîlan Alagoz bal kişand ser bîra çandî ya festîvalê û got, “Em ê îsal bi dirûşma ku vê bîrê nîşan dide û xwe dispêre hilberînê festîvalê lidar bixin. Salên derbasbûyî li gel hemû astengî, zor û zehmetiyan me festîval lidar xistin. Me şanoya Kurdî gihand gel. Di vê demê de me hîn bêhtir hilberand, em hîn mezintir bûn û hîn bêhtir xurt bûn.”
‘EM HÎN BI HÊVÎ Û HÎN XURT IN’
Şîlan Alagoz bal kişand ser detayên lîstikên bêne nîşandan û got, “Bi Kurdî, Soranî, Ermenî û Tirkî wê 11 lîstik bêne nîşandan.
Di festîvalê de wê lîstika me ya nû ‘Rome û Juliet’ bê nîşandan. Em ji bo vê festîvalê hem gelekî bi kelecan in hem jî gelekî kêfxweş in. Em hîn xurt in û em ê hîn bi hêvî derkevin ser dikê.
Îsal gel wê şanoya pirzimanî li her qadê bibîne. Wê bibe festîvaleke ji gelek ziman û gelek çandan. Em bi hev re jiyaneke hevpar dimeşînin û hegirtin û naskirina hev a van çandan gelekî girîng e. Di vê çarçoveyê de wê bibe festîvaleke hembêzkirinê. Me gelekî dixwest bi zimanên cuda lîstikan pêşkêş bikin, lê belê şert û merc guncaw nînin. Hemû ziman û çand wê li ser vê dikê bigihêjin hev.”
‘AMED WÊ BI ŞANOYÊ TÊR BIBE’
Şîlan Alagoz bang li gel kir ku tevlî festîvalê bibe û got, “Mîna her carê bila gel me bi tenê nehêle, em bi hev re vê ronahiyê hîn mezin bikin. Dikarin vexwendînameyan berê werbigirin û li hemû lîstikan temaşe bikin. Bi taybetî em şanohezan vedixwînin. Em bi hev re vê çandê hîn bêhtir belav bikin.”
