Gaziyên şer ên berxwedana Kobanê bi wesîleya 11’emîn salvegera 1’ê Mijdarê Roja Kobanê ya Cîhanê ji ajansa me re axivîn.
‘EM AMADE NE JI BO WELATÊ XWE CANÊ XWE JÎ FEDA BIKIN’
Gaziyê şer Felat Heleb ê yê 2012’an tevlî nav refên YPG’ê bûye anî ziman ku dawiya 2013’an dema li hember gundewarên Kobanê êrîşên çeteyan dest pê kirine di nav berxwedanê de cih girt û got, “Dema em hatin şer hê li gundan bû. Piştre şer berfireh bû û di navenda Kobanê de dest pê kir. Me li Qada Azadî di nav berxwedana Kobanê de cih girt. Çete bi çekên herî giran bi awayekî herî hov û qirêj êrîşî Kobanê dikirin. Çekeke me ya doçka ya 14,5 hebû. Ew çek li her aliyê Kobanê digeriya. Bi îradeya ciwan û jinên Kobanê me li ber xwe dida. Çeteyan nekarîn vê îradeya me bişikînin. Ji her aliyê Kurdistanê jî ciwan hatin û tevlî vê berxwedana rûmetê bûn û her çar parçeyê Kurdistanê li Kobanê bû yek.”
Gaziyê şer Felat anî ziman ku berxwedana li Kobanê tenê ne ji bo Kurdistanê, ji bo tevahiya cîhanê û mirovatiyê hat pêşxistin û wiha dewam kir, “Eger çeteyên DAÎŞ’ê li Kobanê neşikestibana wê derbasî welatên din jî bibana. Cîhan giştî deyndarê Kobanê ye. Heke Kobanê têk çûba, wê tevahiya cîhan têk çûba. Berxwedêrên li Kobanê rê li ber çeteyên DAÎŞ’ê girtin. Divê her kes qedrê Kobanê zanibe. Ez jî weke şervanekî di berxwedana Kobanê de ji serê xwe birîndar bûm, milê min ê rastê felc bû û niha gaziyekî şer im. Tevî vê jî îradeya me neşikest û em amade ne ji bo welatê xwe canê xwe jî feda bikin. Roja Kobanê ya Cîhanê destpêkê li Rêber Apo, şehîdan, hevalên me yên li çiya, li tevahiya gelên Rojhilata Navîn û yên cîhanê pîroz be. Em bi hêvî ne di demên pêş de Rêberê xwe di nav xwe de bibînin. Em serketinê ji bo gelê xwe û azadiyê ji bo Rêberê xwe dixwazin.”
‘DIXWESTIN DOZA AZADIYÊ DI ŞEXSÊ KOBANÊ DE JI HOLÊ RAKIN’
Îsmaîl Muhammed jî ku di berxwedana rûmetê ya Kobanê de bûye gaziyekî şer 1’ê Mijdarê li Rêber Apo, gerîla, şervanên azadiyê û tevahî gelan pîroz kir û wiha axivî, “Dema mirov dibêje, Roja Kobanê ya Cîhanê ev di encama têkoşîn û berxwedaneke têde mayîn û neman hebû ku heta navekî welê mezin bi dest xist. Eger mirov rêxistinkirî, tenzîmkirî û xwedî projeyekê nebe helbet wê destketiyên mirov jî kêm bin. Di êrîşên li ser Kobanê de gelek plan û armancên hêzên cuda hebûn. Bi wan êrîşan dixwestin kesên doza azadiyê dikin di şexsê Kobanê de ji holê rakin û bêjin, ‘Eger hûn qala azadiyê û doza azadiyê bikin, ev tişt wê bên serê we.’ Dixwestin nîşan bidin ku divê her kes koletiyê qebûl bike, bikeve bin emrê sîstem û dewletên serwer ên heyî. Lê belê gelê li hember wan çeteyan û wê zîhniyetê li ber xwe dida, bi fikir û felsefeya Rêber Apo xwe gurçûpêç kiribû. Berxwedêr xwedî wê baweriyê bû ku divê mirov bi îradeya Rêber Apo dabû wan ji bo xak û mirovên xwe bijî. Lewma wan hêzan êrîşên herî hovane li hember vî gelî pêş xistin. Li hember wan êrîşan bi fikir, felsefe û îradeya Rêbertî berxwedan û destaneke dîrokî di rûpelên dîrokê de hatin nivîsandin.”
Îsmaîl Muhammed bal kişand ser berxwedana gel û şervanan a bi heybet û ev xisûs anî ziman, “Tevahiya ragihandin û çapemenî jî bû şahîd ku gel çawa li ber xwe dide, yekîtiya xwe çêdike û doza mafê xwe dike. Lewma tevahî cîhan neçar ma vê îradeya berxwedêr qebûl bike. Her wiha kesên azadîxwaz, rêxistin, enternasyonal û tevgerên bi rastî doza mafê mirovan dikin 1’ê Mijdarê weke Roja Kobanê ya Cîhanê diyar kirin. Bi sedan ciwanên enrternasyonal jî li kêleka şervanên azadiyê li hember çeteyan şer kirin û bi dehan ji wan şehîd û birîndar bûn. Wan hevalan berê qet Kobanê nedîtibûn, lê wê îradeya mezin a li Kobanê kir ku ew hevalên heja werin û tevlî berxwedanê bibin. Berxwedana li Kobanê ew hevgirtin çêkir. Wan çeteyan û alîgirên wan dixwestin gelê Kurd ji holê rakin. Lê berxwedan û îradeya li xaka Kobanê pêş ket û ew têkoşîn di Baxozê re derket. Vê berxwedan û têkoşînê hêza xwe ji fikir û felsefeya Rêber Apo girt. Em dibînin ku li ser vî bingehî gavên mezintir tên avêtin.”
Gaziyê şer Îsmaîl axaftina xwe wiha bi dawî kir, “Em careke din Roja Kobanê ya Cîhanê li Rêberê Rêberan Rêber Apo, gerîlayên li serê çiyayan û tevahî gelên welatparêz pîroz dikin.”
‘TEVAHIYA CÎHANÊ ŞAHIDÎ JI WAN KÊLIYÊN DÎROKÎ RE KIRIN’
Gaziyê şer Mamoste Kobanê jî diyar kir ku ji bo şikandina êrîşên çeteyan ên li ser gel û xaka xwe tevlî berxwedanê bûye û got, “Berxwedana şervanên YPG-YPJ’ê û gel ew teror û hovîtî li Kobanê şikand. Hevalan bi îradeyeke xurt li hember wan êrîşan şer kir. Ew îrade ne îradeyeke jixweber bû. Bi îradeyeke ku fikir û felsefeya Rêber Abdullah Ocalan dabû şervanan berxwedan hat kirin. Hat fêmkirin ku eger ev teror û hovîtiya çeteyên DAÎŞ’ê pêş bikeve wê ji bo hemû welatên cîhanê bibe xeteriyeke mezin. Lewma mecbûr man ku bi Kobanê re bibin alîkar. 1’ê Mijdarê weke Roja Kobanê ya Cîhanê hat îlankirin. Bi berxwedanî û îradeya şervanan û xelkê Kobanê ev êrîş hatin têkbirin. Li dû wê Minbic, Dêrezor, Reqa û hwd. gelek dever hatin rizgarkirin.”
Mamoste Kobanê pêvajoya Aştî û Civaka Demokratîk a Rêber Apo daye destpêkirin jî bi bîr xist û wiha dewam kir, “Em niha di pêvajoyeke girîng de ne. Rêber Apo ji bo pirsgirêk bi rêyên diyalogê çareser bibin Banga Aştî û Civaka Demokratîk kir. Gerîlayên azadiyê jî bi banga Rêber Apo rabûn û gavên girîng pêş xistin. Tevahiya cîhanê şahidî ji wan kêliyên dîrokî re kirin. Hat piştrastkirin ku yên şer dikin, dikarin aştiyê jî bînin. Em ne aşiqên xwînê, berevajî em aşiqên azadî û jiyaneke bi rûmet in da ku gelê me û nifşên me yên pêşerojê karibin di nav aramiyê de bijîn. Em ê ji bo azadiya fizîkî ya Rêbertî bixebitin. Em dixwazin Rêbertiya xwe di nav xwe de bibînin. 1’ê Mijdarê li Rêber Apo, tevahî hêzên xwe yên leşkerî, malbatên şehîdan pîroz dikin.”
