Îro rêveberiya Tevgera Azadiyê ya Kurd bi daxuyaniyek çapemeniyê li Binarê Qendîlê pêngava dîrokî ya ku ji bo rê li ber pêvajoya Aştî û Civaka Demokratîk avêtiye ragihand. Di daxuyaniyê de Endamê Konseya Rêveber a KCK’ê Sabrî Ok, Endama Fermandariya Eyaleta Serhedê ya YJA Starê Vejîn Dersîm û Endamê Konseya Fermandariya HPG’ê û Fermandarê Eyaleta Garzanê Devrîm Palu ku ji Bakurê Kurdistanê hatîn Herêmên Parastinê yên Medyayê jî di nav de 25 gerîlayên azadiyê amade bûn.
Yek ji Gerîlayên Azadiyê Nuda Arîn ku ji herêma Botan a Bakurê Kurdistanê hatiye Herêmên Parastinê yên Medyayê, têkildarî pêngava dîrokî ya gerîla û rola jinan di vê pêvajoyê de ji Rojnews’ê re axivî.
Gerîlaya Azadiyê Nuda Arîn destnîşan kir ku bi vê gava îro nîşan dan ku ew çiqas li pişt biryarên Kongreya 12’an û banga Rêber Apo ya 27’ê Sibatê ya ‘Aştî û Civaka Demokratîkin’ û wiha got: “Wek şervanên jin ên Rêber Apo û gerîlayên YJA Starê, bi fikir û felsefeya Rêber Apo di nav vê pêngav û pêvajoyê de rol û mîsyonek giring ya me hebû. Em amade ne her erk û berpirsyartiya ku Rêber Apo bide ser me bi cih bînin. Ev erkê bingehîn yê me ye, bi taybetî jî wek jin. Ji bo nîşandana ked û dilsoziya xwe ya ji bo ked û têkoşîna ku Rêber Apo ji bo jinan daye, emê guh nedin ti zext û zehmetiyan. Em ji bo her erkê amade ne. Ji bo me ya herî girîng ewe ku em hêjayî fikir û felsefeya Rêber Apo bin.”
Nuda Arîn qala giringiya pêvajoya Aştî û Civaka Demokratîk kir û wiha domand: “Pêvajoya ku Rêber Apo niha pêş de dibe pir girîng û dîrokî ye. Ew nivîskarekî sedsalî ye ku bandorek li ser tevahiya herêm û cîhanê dike. Ev ne tenê bi şerê Kurd û Tirkan ve girêdayî ye, di heman demê de pêşeroja cîhanê jî diyar dike. Em li Rojhilata Navîn bi hemû netewe, reng û pêkhateyan bi metirsiyek mezin re rû bi rû ne. Tenê kesê ku ev metirsî fêm kir û ji bo pêşîgirtina wê gav avêt Rêber Apo bû. Ji ber vê yekê, divê gelê Kurd û hemû netewe ji bo serxistina pêjavoyê seferber bibin. Her erka ku bikeve ser milê wan bi cih bînin.”
