Ji bo gerîlayê HPG’ê Lokman Gazyak (Gelhat Cûdî) ê ku hat eşkerekirin di 17’ê Kanûna 2021’ê de li qada Garê ya Herêmên Parastinê yên Medyayê şehîd bû, li bajarê wî Cizîrê taziye hat danîn. Taziye bi pêşengiya MEBYA-DER’ê bi beşdariya nûnerên partiyên siyasî û rêxistinên demokratik û gelek kesan hat ziyaretkirin.
Taziye ku li Taxa Konakê hat danîn, bi rêzgirtinê destpê kir. Nûnerê MEBYA-DER’ê Ramazan Togrûl diyar kir ku ew ê heya dawiyê xwedî li nirxên gelê Kurd derkevin.
Parlamentera DEM Partiyê ya Şirnexê Newroz Ûysal Aslanê jî got, di vê pêvajoyê de armanca wan xwedîderketina li nirxan e.
Apê Lokman Gazyak Hasan Gazyak jî got, bila serê Rêber Apo sax be û ew şehîdê gelê kurd e.
Serdan piştî duayan bi dawî bû.
