Navenda Ragihandin û Çapemeniyê ya HPG’ê derbarê gerîlayê şehîd, ev daxuyanî da:
“Hevrêyê me Mazlûm Yekta berê ji ber nexweşiyekê li Herêmên Parastinê yên Medyayê tedawî didît, roja 15’ê Sibatê car din bi giranî nexweş bû. Tevî hemû mudaxileyan jî, hevrêyê me şehîd bû.
Hevrêyê me Mazlûm ji dema tevlî nava refên gerîla bûyî û heta şehadetê, her tim bû xwedî têkoşîneke li ser xeta fedayîtiyê. Bi dilsoziya xwe ya ji bo nirxên azadiyê û kesayeta xwe ya fedakar bû milîtanekî Apoyî yê mînak. Hevrêyê me pirsgirêkên tenduristiyê yên girîng, ti carî li pêşiya xwe asteng nedît; bi tevlîbûna xwe ya bi moralê bilind, bi coş û kelecan wezîfeyên xwe yên demê bê kêmahî bi cih anîn. Weke zarokek wêrek ê gelê me yê Efrînê çand, exlaq û terbiyeya ku ji malbat û derdora xwe girtî, bi pîvanên jiyana Apoyî re kir yek û bû milîtanekî fedayî. Li her qada têkoşînê, bi hevrêtiya xwe ya samîmî û dirûst derket pêş. Şehadeta zû ya hevrêyê me Mazlûm em xistin nava xemgîniyeke kûr. Ew ê bi dilsoziya xwe ya bi jiyana azad re, ji bo me hemûyan bibe rênîşana jiyanê.
Li ser vê bingehê, di serî de malbata hêja ya hevrê Mazlûm em ji hemû gelê Kurdistanê yê welatparêz re sersaxiyê dixwazin û soza xwe dubare dikin ku bîranîna şehîdên xwe li Kurdistana azad bidin jiyîn.
Agahiyên derbarê nasnameya hevrê Mazlûm Yekta bi vî rengî ne:
|
|
Nasnav: Mazlûm Yekta |
Efrînê malûvanî ji civakbûn û çanda qedîm a bi hezaran salan a gelê me re kiriye, her tim bûye sembola Kurdîtiya azad û bi rûmet. Xelkê me yê Efrînê yê hêja tevî hemû êrîşên dagirkerî û îlhaqê ti carî ji vê sekna xwe tawîz neda, lewma bûye bajarê berxwedanê û ji hemû gelê Kurdistanê re bûye mînak. Bi hezaran lehengên ku ji nava xwe derxistî, hem ji bo Efrînê û hem jî ji bo parastin û azadkirina Kurdistanê tevkariyên bêhempa li têkoşîna xwe kiriye. Lewma xelkê me yê Efrînê di dilê hemû gelê Kurd de xwedî cihekî taybet e. Bi sekna xwe ya serhildêr a ku serî li hember dijmin netewand, ev pênase heq kiriye. Xelkê me yê Efrînê herî dawî bi berxwedana xwe ya destanî ya di sala 2018’an de li dijî dagirkeriya Tirk raber kirî, ji bo hemû gelê Kurdistanê bû mînak. Li dijî sirgûn, koç, zext û komkujiyan bi serbilindî li ser piyan sekinî û hem israra xwe ya di jiyana azad de, hem jî dilsoziya xwe ya bi Rêber Apo re car din nîşanî herkesê daye.
Hevrêyê me Mazlûm zarokekî vê xelkê bi wêrek e. Li Cindirêsê di nava malbateke welatparêz de hate dinê. Ji ber ku malbata wî girêdayî çand û xaka xwe bû, li gorî cewherê xwe mezin bû. Bi pêşketina têkoşîna me ya azadiyê re malbata wî bi xwestek û kelecaneke mezin tevlî xebatan bû, zanebûna azadiyê bi dest xist û her roja borî têkoşîna xwe mezin kir. Vê yekê di temenekê biçûk de hevrêyê me Mazlûm jî bandor kir. Hevrêyê me di temenekî zû de Apoyî nas kirin û bi guhdarkirina çîrokên lehengiyê yên gerîla mezin bû. Lewma gerîla weke lehengên zarokatiya xwe dît û weke armanceke ku divê xwe bigihînê û pêk bîne, dît. Di vî warî de hevrêyê me bi xwe re xeyalên xwe jî mezin kir. Bi Şoreşa Azadiyê ya Rojava re hîn zêdetir nêz bû ku vê xeyala xwe pêk bîne. Di vê pêvajoyê de ji sekna jiyanê ya milîtanên Apoyî û ji fedakariyên wan ên di şerê li dijî çete û dagirkeran de pir bandor bû. Hevrêyê me dît ku jiyan, sekin, cesaret û lehengiya gerîla ya di xeyalên wî de, heqîqetek e. Ji bo xwe bigihîne armanca xwe ya zarokatiyê, lêhêrbûnên xwe kûr kir. Her çendî ku zû berê xwe da çiyayên Kurdistanê û xwestibe tevlî nava refên gerîla bibe jî, ji ber ku temenê wî biçûk bû her carê neçar ma ku vê xwesteka xwe taloq bike. Lê belê êrîşên dagirkeriyê yên ku dewleta Tirk a dagirker sala 2018’an li ser Efrînê dayî destpêkirin, ji bo hevrêyê me Mazlûm bû xala werçerxê. Hevrêyê me bû şahidê komkujî û êrîşên dermirovî yên ku dewleta Tirk li dijî gelê me pêk anî. Lewma li dijî dewleta Tirk bû xwedî hêrseke tolhildanê ya mezin. Hevrêyê me Mazlûm dizanî ku divê hêrsa xwe rêxistin bike, tevlî têkoşînê bike û di ferqê de bû ku ev yek jî encex bi tevlîbûna nava refên gerîla pêkan e. Li ser vî bingehî sala 2019’an hevrê me berê xwe da çiyayên Kurdistanê û tevlî nava refên gerîla bû.
Hevrêyê me Mazlûm ji kêliya destpêkê ve dît ku tiştên têkildarî hevrêtî û jiyana gerîla bihîstine, heqîqet e. Bi samîmiyet û sadetiyeke zarokane, tevlî jiyanê bû. Hevrêyê me bi saya dilê xwe yê paqij, di nava demek kurt de hezkirina hemû hevrêyên xwe qezenc kir. Tarzê tevlîbûna fedayî ya ku cewherê partiya me PKK’ê ye, esas girt. Hevrêyê me fikirî ku xwe bi temamî fedayê têkoşîna jiyana azad bike û bi vî rengî zincîrên qirkirinê yên li dijî gelê me, bişikîne. Di ferqê de bû ku ev yek encex bi xwe gihandina cewherê PKK’ê pêkan e. Hevrêyê me di vî warî de bi xwestekek mezin, coş û kelecan tevlî perwerdeyên îdeolojîk û leşkerî bû. Di nava demek kurt de bû gerîlayek azad. Bi taybetî li dijî êrîşên dijmin ên li hemberî gel û Tevgera me, hêrsa tolhildanê ya hevrê Mazlûm hîn zêdetir kir. Ji ber vê yekê hevrêyê me xwest demildest beşdarî xebatên pratîkî bibe. Bi kesayeta xwe ya xebatkar, dirûst û fedakar bawerî da hevrêyên xwe.
Hevrêyê me Mazlûm piştî ku perwerdeya xwe bi rengekî serketî qedand, xwesteka xwe ya ji bo tevlîbûna xebatên pratîkî pêk anî. Li gelek qadên Herêmên Parastinê yên Medyayê xebat meşand. Hevrêyê me li dijî zêdebûna êrîşên dijmin, tevlîbûna xwe timî lêpirsîn kir û bawer kir ku divê teqez bibe xwedî sekneke ji van êrîşan re bibe bersiv. Hevrêyê me li ser vê bingehê xwe di taktîkên şerê gerîla yên dema nû de pêş xist û tiştên fêr bûyî bi rengekî serketî xiste nava pratîkê. Ji sala 2021’an û şûnde tevî pirsgirêkên tenduristiyê yên çêbûne jî, hevrêyê me kêliyekî jî nexwest ji xebatên pratîkî qut bibe. Bi vê sekna xwe rêz û hurmeta hemû hevrêyên xwe qezenc kir. Tevî vê yekê jî hevrêyê me bi sîstematîk tedawî dît. Dilê wî her tim li cem hevrêyên wî yên ku di tunelên berxwedanê de li dijî dagirkeran şer dikin, bû. Hevrê Mazlûm tedawiya xwe ya demdirêj temam kir û ji bo di pêvajoya şer de cih bigire, bi israr car din derbasî Herêmên Parastinê yên Medyayê bû. Hevrêyê me fikirî ku divê teqez tecrîda giran û sîstematîk a li dijî Rêbertiya me, bişikîne. Di vî warî de hem ji bo fêmkirina Rêbertî hem jî ji bo felsefeya wî bixe pratîkê, ket nava lêhêrbûnên girîng. Hevrêyê me ji dema gihiştî nava refên gerîla û şûn de, armanc dikir ku tarzê tevlîbûna fedayî bi dest bixe. Lêhêrbûn û lêgerînên xwe yên di vî warî de, xwest weke pêdiviya dilsoziya bi Şehîd Sara û Şehîd Rûken re yên ku sala 2022’yan li Mêrsînê çalakiya fedayî kirin û bi Şehîd Erdal û Şehîd Rojhat re yên ku sala 2023’yan li Enqereyê çalakiya fedayî kirin, bixe pratîkê. Hevrêyê me fikirî ku vê yekê encex di bin bunyeya Hêzên Taybet de eger beşdarî xebatan bibe, dikare pêk bîne. Li ser vî bingehî derbasî van xebatan bû. Hevrêyê bi perwerdeyên dîtî re, di tarzê jiyana fedayî de pêş ket. Xwe bi temamî fedayî têkoşînê kir. Berê hevrêyê me her tim li qadên ku şer lê zêde bû, bi israr xwest derbasî van qadan bibe û bi hevrêyên xwe re mil bi mil şer bike. Hevrêyê me Mazlûm piştî ku perwerdeya xwe bi serketî qedand, dest bi xebatên pratîk kir û bi fedakariya xwe ya di xebatan de derket pêş. Di sala 2024’an de pirsgirêkên wî yên tenduristiyê car din derketin holê, lewma car din dest bi pêvajoya tedawiyê kir.
Tevgera me hemû derfetên xwe seferber kir û pêdiviya tedawiyê ya hevrê Mazlûm pêşwazî kir. Di vê pêvajoya demdirêj de lêhêrbûnên xwe yên ji bo fedayîtiyê, domand. Hevrêyê me ji berxwedana Rêber Apo ya li Îmraliyê û ji berxwedana hevrêyên xwe yên li tunelên berxwedanê, moralekî mezin girt. Tevî ku nexweşiya wî giran bû, her tim hêviya xwe zindî hişt. Hevrêyê me kêliyekê jî ji xwesteka xwe ya ji bo azadiyê tawîz neda. Bi sekna xwe ya di pêvajoya tedawiyê de û dirûstiya xwe ya di peywendiyên hevrêtiyê de, hemû hevrêyên xwe bandor kir. Roja 15’ê Sibatê nexweşiya hevrê Mazlûm giran bû û tevî hemû mudaxileyan, tevlî karwanê şehîdan bû. Şehadeta wî ya zû, em gelek xemgîn kirin. Em soz dikin ku armanc û xeyalên hevrê Mazlûm bikin hinceta xwe ya têkoşînê û bîranîna wî li Kurdistana azad bidin jiyîn.”
