Rêber Apo li 15’ê Sibata 1999’an di encama komployê navnetewî de dîl hate girtin û teslîmî dewleta Tirk hate kirin. Ji wê rojê heta niha di bin tecrîdeke giran de tê ragirtin. Gerîlayên HPG’ê Xebat Med û Delîl Demhat têkildarî kKomploya 15’ê Sibatê ji ANF’ê re axivîn.
Gerîla Xebat Med anî ziman ku 15’ê Sibatê ji bo gelê Kurd rojekê reş e û got: “Sedemên vê komployê pir kûr in. Ji lew re vê rewşê bi nirxandinekê dest girtin têrker nîne. Her sal gelê me yê welatparêz, milîtanên vê tevgerê û wek fedaiyên Rêber Apo li hemberî vê komployê hêrs û kîna me mezintir dibe. Vî gelî biryara xwe daye; em ê bi Rêbertiya xwe re bijîn! Kes nikare vê asteng bike. Komploya ku di 15’ê Sibatê de li hemberî Rêber Apo pêkhat komployekî ku li cihanê tu mînakê wî nîne. Dagirkirinên aborî, siyasî û leşkerî her tim çêbûne. Lê dagirkeriya ku li Kurdistanê çêbûye, li tu deverê cihanê mînaka wê nîne. Mînak, li dîrokê gelek komkujî çêbûn, lê ev komkujî dîroka mirovahî her tim bi navên xwe hatin bibîranîn. Komkujiyên ku li hemberî Cihûyan jî her tim bi navên xwe hatin bibîranîn. Cihû tiştên ku li hemberî wan pêkhatin tu car jibîr nekirin. Lê li Kurdistanê rewş cuda bû; Kurd tune hatin hesibandin. Pergalekî ku hebûna Kurdan înkar dikir hate avakirin. Ji ber vê têkoşîna Kurdan tenê têkoşînek li hemberî dewletê nîne, têkoşînek li hemberî hemû cihanê tê dayîn e.
Gelek partiyên şoreşger hene. Dema tevlî van partiyan dibin, rêgezên wan dipejirînin û dibin endamê wê. Lê PKK’yî bûyîn, ji bo Kurdistanek azad têkoşîn meşandin e. Xeta ku PKK’ê diyar kiriye, di astekê mezin de li ser fedakarî hatiye avakirin.
Rêgeza bingehîn a PKK’ê fedaîtî ye. Ji ber vê têkoşîna li Kurdistanê ye ewqas mezin bû. Ev xet, xeta Rêber Apo ye. Lewre Rêbertî, li hemberî hemû cihanê têkoşînek da destpêkirin. Heger wek gel hebûna Kurdan û pêwîstiya azadiya Kurdistana difikirin wê çaxê divê li hemberî hemû cihanê têkoşînê bimeşînin. Ji ber vê Rêbertî bi têkoşîna ku da destpêkirin re hemû cihanê girt li hemberî xwe.”
‘BÎRDOZIYA RÊBERTÎ XWEDÎ HÊZA GUHERTINA CIHANÊ YE’
Xebat Med bibîr xist ku serdema ku Rêber Apo li Kurdistanê têkoşîn da destpêkirin ji gelê Kurd re dihat ferzkirin eşiqê kujerê xwe bibe û wiha axivî: “Rêber Apo berî her tiştî li Kurdistanê ronîbûna gel pêk anî. Îro dema ku em hatin Rêbertî tenê Rêberê gelê Kurd nîne, Rêberê hemû bindestan e. Her çendî dijmin xwest vê asteng bike jî, bi ser neket. Divê armanca Komploya 15’ê Sibatê baş were fêmkirin. Hêzên kapîtalîst Rêber Apo wek gefek mezin dîtin. Fêmkirin ku Rêber Apo ji bo wan xetereyek mezin e. Lewre ev tevger û bîrdozî tenê ji bo Kurdistan azad bike ve sînordar nebû; xwedî hêza guhertina cihanê bû. Li hemberî modernîteya kapîtalîst alternatîfbûnê temsîl dikir.
Em di 26’emîn salvegera komployê de dubare soz didin ku em ê di şexsê şehîdên ‘Hûn Nikarin Roja Me Tarî Bikin’ de girêdayî hemû şehîdan bimînin. Xeyala hevrêyên me yên şehîd azadiya fîzîkî ya Rêber Apo bû. Rêbertî îradeya gelan temsîl dike. Di şexsê Rêber Apo de em hemû li Îmraliyê ne. Dema behsa azadiya fîzîkî ya Rêbertî dikin, di rastiyê de behsa azadiya xwe dikin. Em dixwazin azad bibin, xwe azad bikin û welatê xwe azad bikin.
Ji bo vê em dubare soz didin ku em ê bi Rêbertiya xwe re bijîn, xwîna şehîdên xwe li erdê nahêlin. Bi vê wesileyê carekê din Komploya 15’ê Sibatê lanet dikim û komplogeran şermezar dikim. Şehîdên ‘Hûn Nikarin Roja Me Tarî Bikin’ carekê din bi mînet û hurmet bibîr tînim.”
‘GELÊ KURD BERÎ TÊKOŞÎNÊ HATIBÛ ASTA TINEBÛNÊ’
Gerîlayê HPG’ê Delîl Demhat bibîranîna şehîdên şoreşê dest bi axaftinên xwe û wiha got: “Em ê li hemberî Komploya 15’ê Sibatê têkoşîna xwe mezintir bikin û bi berxwedanek mezin bersiv bidin dijmin. Rêber Apo avakarê hebûn û azadiya me ye. Lewre gelê Kurd beriya vê têkoşînê hatibû asta tinebûnê. Dihat xwestin ku navê Kurdan jî ji dîrokê were jêbirin. Felsefeya Rêber Apo ji bo gelê Kurd, Rojhilata Navîn û mirovahiyê bû hêviya azadiyê. Ji ber vê hêzên ku di komployê de cih girtin negihîştin armanca xwe. Rêber Apo bi taybet parêznameyên xwe re hesabê hemû komplogeran serûbin kir.
Hêzên kapîtalîst dema dîtîn paradîgmaya Rêbertî li dijî berjewendiya wan e, Komploya 15’ê Sibatê pêk anîn. Ji ber vê bi salan e polîtîkayê tecrîdê didomînin. Dixwazin pêşiya belavbûna fikrên Rêber Apo bigirin. Lê Rêbertî, her tim dibêje ji bo çareseriyê muxatabek digere. Em jî dibînin ku muxatab ji bo çareseriyê ne amade ne. Lewre berjewendiyên xwe difikirin.
Em şahidiya berxwedana mezin a Rêber Apo dikin. Ev ji bo me û gelê me perspektîfa berxwedanê ye. Erka me ji bo azadiya fîzîkî ya Rêber Apo di her qadê de têkoşînê mezinkirin e. Rêber Apo rênîşandarê me ye. Ji ber vê em ê heta dilopa dawî ya xwîna xwe têbikoşin û şer bikin!”
