Gerîlayên Azadiya Kurdistanê, diyar kirin ku ew li ser esasê banga Rêber Apo û biryarên Kongreya 12’emîn a PKK’ê ji herêmên ku rîska şer lê heye vekişiyane. Gerîlayan, anîn ziman ku ji bo avakirina Civakeke Demokratîk li her qadê amadekariyên xwe dê bikin û destnîşan kirin ku armanca wan a sereke azadiya Rêber Apo ye. Gerîlayan, bang li hemû gelan kirin ku di vê pêvajoyê de bi rengekî çalak beşdar bibin.
Tevgera Azadiya Kurdistanê di daxuyaniyekê de ku li Qendîlê hat dayîn, gaveke dîrokî ber bi pêvajoya Aştî û Civaka Demokratîk ve ragihand. 25 gerîlayên azadiyê, tevî Endamê Konseya Rêveber a KCK’ê Sabrî Ok û her wiha fermandarên YJA Star û HPG’ê, beşdarî daxuyaniyê bûn.
Gerîlayên tevlî vê pêngava dîrokî bûn ji ANF’ê re axivîn û diyar kirin ku ew ji bo misogerkirina serketina pêvajoyê, li gorî banga Rêber Apo û biryarên Kongreya 12’emîn a PKK’ê ji herêmên ku rîska şer lê heye vekişiyane.
Gerîlaya YJA Starê Nûda Arîn got, “Ez gerîlaya herêma Botanê me û di vê pêngavê de cih digirim. Armanca me ew e ku em li gorî banga Rêber Apo û biryarên kongreyê tevbigerin. Bi vekişînê re, me gaveke dîrokî avêt. Em ê rola xwe ya ji bo Projeya Aştî û Civaka Demokratîk bilîzin.”
Nûda Arîn, destnîşan kir ku tevî zehmetiyan jî, gerîlayên jin di felsefeya Rêber Apo de hêzê dibînin û got, “Pêşengiya civakê û avakirina jiyana komunal erkê me yê bingehîn e.”
Gerîlayê HPG’ê Kendal Mîtra jî wiha got, “Pêngava ku em diavêjin stratejîk e; em ê di kesayetiya xwe de guhertin û veguherînê biafirînin. Em amade ne ku civakek demokratîk ava bikin. Armanca herî girîng ji bo me azadiya Rêber Apo ye.”
Mîtra, bang li hemû gelan jî kir û got, “Divê her kes berpirsiyariyên xwe bicîh bîne û ne tenê piştgiriyê bide, di heman demê de bi awayekî çalak beşdarî pêvajoyê bibe.”
