Hevserokê Konfederasyona Civakên Kurdistaniyên li Elmanyayê (KON-MED) Kerem Gok ji ANF’ê re li ser wate û armanca meş û mîtînga 8’ê Mijdarê ya li bajarê Koln ê Elmanyayê axivî.
Kerem Gok diyar kir ku azadiya Rêber Apo jiyanî ye; ji bo gelê Kurd, ji bo pêkhatina aştî û civaka demokratîk gelekî girîng e û got, “Di sala 2023’an de bi navê ‘Azadî ji Rêber Apo re, çareserî ji pirsgirêka Kurd re’ pêngavek hate destpêkirin. Ev pêngav ji aliyê derdorên ne Kurd li 74 navendên li 5 parzemînan ve hate destpêkirin. Di konjonktura heyî de bersivek li hemberî wan derdoran bû ku hewl dide pirsgirêkê bi rê û rêbazên zordariyê çareser bikin. Çavkaniya motîvasyonê ya pêngavê jî paradîgmaya Rêber Apo bû.
Derdorên li derveyî gelê Kurd bi bandora ji paradîgmaya Rêber Apo pêngava ‘Azadî ji Rêber Apo re, çareseriya siyasî ji pirsgirêka Kurd re’ pêngavek dan pêşniyarkirin û destpêkirin.
Heta niha di çarçoveya pêngavê de me li Kolnê 2 meş lidar xistin. Herdu meş jî gelekî bi heybet bûn. Bi van meşan hem ji saziyên Ewropî re hem jî ji dewletên dagirker re peyam hate dayin; hem jî tabloyeke welê derkete holê ku gelê me û gelên din, reng û çandên din gihîştin hev.
Me dît bê paradîgmaya Rêber Apo çawa enternasyonal dibe û kîjan sînoran derbas dike.
Bi pêngavê re peyam ji derdorên civakî û siyasî û ji hêzên statukoparêz ên herêmî re hate dayin. Di wê baweriyê de me ku van derdoran peyama xwe wergirtin. Tevlîbûna gel a di vê astê de û xwedîderketina li Rêber Apo bû sedem ku zext li ser hin saziyan bê kirin û neçar bimînin biryarê werbigirin. Mînaka vê yekê jî ew e ku ‘mafê hêviyê’ kete rojeva Konseya Ewropayê û Neteweyên Yekbûyî.”
Li ser cudahiya meşa îsal jî Kerem Gok ev nirxandin kir: “Girîngiya meşa îsal ji yên din cuda ye. Hem girîng e, hem jî acîl e. Di meşên beriya niha de me digot, ‘Bila tecrîd bişikê’ tecrîd heta astekê şikest.
Bi vê meşê re em dibêjin êdî bes e: Divê Rêber Apo ji Îmraliyê derkeve. Ji ber ku em Rêber Apo weke nûnerê 60 milyon Kurdî dibînin. Ragirtina nûnerê 60 milyon Kurdî li nava çar dîwaran antî demokratîk e; binpêkirina mafên gelê Kurd e.
Ev yek ezmûnek e. Li kîjan devera cîhanê nûnerê siyasî yê gel an jî neteweyekê ragirtî ye? Gelo li Danîmarka, Hollanda, Swêd an jî Elmanyayê rewşeke bi vî rengî dikare bê dîtin? Lê belê îradeya siyasî ya Kurdan li Îmraliyê tê ragirtin – her wiha ji 15’ê Sibata 1999’an û vir ve di bin tecrîdeke giran de ye.
Îro diyalogekê destpê kiriye. Divê bangên bi vî rengî li saziyên Ewropî bê kirin ku qala demokrasî, serweriya hiqûqê û mafan dikin; li gorî pîvanên xwe wezîfeyên xwe bi cih bînin. Ji ber ku di hiqûqa wan de ev maf hene.
Rêber Apo divê bi lez bê berdan. Her saet, her deqe, her kêliya ku Rêber Apo li wir tê ragirtin ji bo demokrasiyê windahiyek e. Ji ber vê jî em dibêjin divê Rêber Apo tavilê ji Îmraliyê derkeve û sîstema Îmraliyê ji hev bê xistin. Êdî divê polîtîkaya zext û îmhayê li ser gelê Kurd neyê meşandin; ev polît3ıka encamê bi xwe re nîne, dibe sedem ku hîn bêhtir xwîn bê rijandin.
Ev polîtîka zerarê dide civakan. Divê aştî pêk were. Di afirandina demokrasî û aştiyê ji bo gelên bindest de Rêber Apo aktorê sereke ye.”
‘MEŞ TEVLÎBÛNA LI BANGA AŞTÎ Û CIVAKA DEMOKRATÎK E’
Kerem Gok herî dawî got, “Di 8’ê Mijdarê de bi pêşengiya jin û ciwanan weke civak bi civakên din re divê em biherikin Kolnê. Em careke din bi bîra hemû sazî û hêzan bixin ku ji bo xwedîderketina li pêvajoya Rêber Apo em ê îradeyekê nîşan bidin.
Di vê pêvajoya ku ji aliyê Rêber Apo ve hatiye destpêkirin de ji bo rêbazên aştiyane li pêş be û rola pratîkî ya Rêbertî nîşan bidin, em ê tevlî vê meşê bibin. Banga 27’ê Sibatê ya Aştî û Civaka Demokratîk a Rêber Apo hem ji bo aştiya bi hêzên dewletê re ye hem jî ji bo demokratîkbûna civakê ye.
Em avaniyeke demokratîk in; alîgirê wê yekê ne ku pirsgirêk bi rêya diyalogê bêne çareserkirin. Rêber Apo rêyên diyalog û dîplomasiyê daniye pêşiya me; zemînek ava kiriye. Tevlîbûna li vê meşê di heman demê de tevlîbûna li Banga Aştî û Civaka Demokratîk a 27’ê Sibatê ya Rêbertî ye.
Lewma meşa îsal ji meşên salên derbasbûyî cuda û girîngtir e. Ji bo pirsgirêkên gelên Rojhilata Navîn pirsgirêka Kurd çarenûsê diyar dike. Nêzîkatiya çareserî û diyalogê ya di şexsê Kurdistanê de wê bandorê li meseleyên din jî bike. Tevlîbûna li meşê tê wateya tevlîbûna li banga Rêbertî. Di vê astê de gaveke girîng, jiyanî û dîrokî ye.”
