Serokwekîla Koma Partiya Demokrasî û Wekheviyê ya Gelan (DEM Partî) Gulistan Kiliç Koçyîgît li meclîsê civîneke çapemeniyê lidar xist û bûyerên di rojevê de nirxand.
Gulistan Kiliç Koçyîgît anî ziman ku komîsyon ji bo hêsanîkirina çareseriya meseleya Kurd li derdorên cuda guhdarî dike û diyar kir ku guhdarîkirina li karsaz û konfederasyonên sendîkayan wê girîng be.
Koçyîgît got, “Belê ev komîsyon li her kesî guhdarî dike; ji derdorên kar heta bi mexdûran, ji serokên meclîsê heta bi Yekîtiya Baroyan, baroyên herêmê û serokên baroyan. Lê belê divê li kesekî din jî guhdarî bike. Ev komîsyon divê bi lez biçe Îmraliyê û bi Birêz Ocalan re hevdîtinê bike ku aktorê sereke yê pêvajoyê ye. Divê li nêrîn, fikir û pêşniyarên wî guhdarî bike.”
Koçyîgît destnîşan kir ku ev yek di heman demê de ne bendewariyek e; nîşaneya şênber a daxwaza aştiyê ya gelan e, pêwîstiya pêvajoyê ye û bi vî rengî dwam kir: “Dawiya dawî eger em pirsgirêkeke dîrokî weke pirsgirêka Kurd çareser dikin, eger em qala rabirdûyeke bi qasî 100 salî û şerekî 40 salî dikin, eger em li ser afirandina atmosfereke nû diaxivin, wê demê divê em sînorên heyî ji pêşiya xwe rakin, jiberkiriyan dînin aliyekî û gavên bi wêrekî biavêjin.”
Serokwekîla Koma DEM Partiyê diyar kir ku hevdîtineke bi vî rengî wê pêvajoyê bi pêş ve bibe û got, “Ya herî girîng jî wê baweriya civakî ya bi pêvajo û çareseriyê xurt bike. Wê bibe gaveke girîng ku pêşî li pêvajoyê vedike.”
