Li Kobanê li Qada Şehîd Egîd ji bo şehîd Emîne Erciyes, Zîn Zagros û Ekîn Amara Tolhildan konê sersaxiyê hate vedan. Jinên ji Kobanê têkildarî têkoşîna şehîdên nemir ji ANF`ê re axivin û diyar kirin ku ew ê li gel şopandina rêya şehîdan teqez ser bikevin.
`NEXŞEYA AZADIYÊ WÊ BI DESTÊ JINAN WERE XÊZKIRIN’
Hevseroka Partiya Yekîtiya Demokratîk (PYD) a Kantona Firatê Bêrîvan Îsmaîl di merasîmê de axivîî diyar kir ku jin di hemû warên jiyanê de pêşeng in û got: “Em soz didin şehîd Emîne, rêhevalên wê û berxwedaniya gerîlayan a salên dûr û dirêj ku em ê teqez berxwedaniya wan bişopînin. Bi hezaran jin ji bo azadiya vê civakê di vê rêwîtiyê de şehîd bûn. Jinan li hemberî tarîtiya DAÎŞ’ê li ber xwe dan û li hemberî desthilatdarî tarîtiyê rabûn û jin xwedî rastî û heqîqetê ne. Jinan girêdayî wê heqîqetê berê xwe dan çiyayên azad, ew çiyayên ku wê nexşeya azadiyê ji nû ve bineqişînin.”
Dayîka bi navê Necmê Kinco jî axivî, anî ziman ku jinên azad li hemberî dagirkeriyê li her derê berxwedaniyeke bêhempa nîşan dan û ev yek anîn ziman: ‘’Jinan hem li çiyayan û hem jî li zîndanan li hemberî dagirkeriyê li ber xwe dane. Ew jî bi saya fikr û felsefeya Rêber Apo pêk hat. Êdî em ne ew jin in ku di nava çar dîwaran de werin zîndanîkirin. Êdî me zîncira koletiyê qetandiye, êdî em bûne pêşeng. Vaye jinên me yên şervan û siyasetmedar ku li çeperên herî pêş li ber xwe didin û li ser maseyan bi dîplomasiyê doza mafê xwe dikin. Ev jî bi saya jinên me yên pêşeng pêk hat û em bi saya Rêber Apo li vir in.’’
`EM Ê XETA BÊRÎTAN, SAKÎNE, LEYLA Û EMÎNEYAN BIŞOPÎNIN`
Endama Çand û Hunera Baqî Xido Leyla Ehmed jî destnîşan kir ku ew ê li pey şopa wan jinan bin ku ji bo azadiyê tevî hemû şert û mercan jî li ber xwe dane û ev yek anîn ziman: ‘’Em ê ji bo tevahiya gelan welatekî azad bipejirînin. Em ê tim û tim rêya wan bişopîn in, ji ber ku ew ji bo azadiya welatekî li ber xwe didin. Cîhan hemû li hemberî berxwedaniya wan jinan matmayî maye. Em ê li ser xeta Sakîne, Leyla, Bêrîtanan û niha jî ya Emîneyan li ber xwe bidin. Ew bûne aşiqê azadiyê, ji ber wê ew ê di dilê me de tim û tim zindî bimînin.”
