Bi sedan şêniyên Kobanê, endamên sazî û dezgehên Rêveberiya Xweser, partiyên siyasî, rêxistinên jinan şervanê YPGˊê şehîd Kendal Kortik (Mihemed) ê di 26ˊê Çileya 2026ˊan de li bajarê Çelebiyê di bersivdana êrişên çeteyên hikumetê û dewleta Tirk de şehîd bûbû, li Pakrewangeha Şehîd Dilce ya Kobanê veşart.
Ji bo şervanê YPGˊê Gîvara Kobanê (Diyar Mehmûd) di 18ˊê Çileya 2026ˊan li Dêrazorê û şervanên YPJ`ê Agirê Zagros (Zeyneb Eto) û Sîyajîn (Diyala Koro) di 18`ê Çileya 2026`an li Reqayê şehîd bûn, merasîma bibîranînê hat lidarxistin.
Merasîmê bi deqeyek rêzgirtinê dest pê kir. Dûre Endama Meclîsa Malbatên Şehîdan a bajarê Kobanê Emel Behadîn sersaxî ji malbata şehîdan re xwest û soza şopandina rêya şehîdan da.
Emel Behadîn diyar kir ku ew ê şopdarên rêya şehîdên xwe bin û xewn û xeyalên şehîdên xwe pêk bînin û wiha got: “Şehîdan ji bo gel berxwedaneke bêhempa da meşandin, divê her kes jî xwedî li mîrasa şehîdên xwe derkevin û şopdarên xeta azadiyê bin.”
Rêveberiya Giştî ya TEV-DEM`ê Cahid Hesen destnîşan kir ku ew ê berxwedana xwe xurtir bikin û tola şehîdên xwe ji dijminê hovane hilînin, diyar kir ku: “Divê em tenê xeta berxwedanê ji xwe hilbijêrin. Ji ber ku dem dema serkeftinê ye û em ê bi berxwedana xwe bi ser bikevin. Divê em welatê xwe biparêzin û li ber xwe bidin. Em li pişta şervanên xwe ne, em hêza xwe ji şervanan digirin.”
Dûre rêhevalê şehîd Kendal, Elî Firat anî ziman ku şehîd Kendal bi cesaretekî herî xurt li hemberî dijmin li ber xwe dida û têkoşîn dikir heta kêliya dawiyê û got: “Em jî soz didin şehîdên xwe ku em ê şopdarên rêya şehîdên xwe bin, em ê dijmin têk bibin.”
Piştre wesîqayên şehîdan hatin xwendin û radestî malbatên wan hatin kirin.
Şehîd Kendal Kortik bi dirûşmên “Şehîd Namirin” hat veşartin.
