Kobanê bi Festîvala Arîn a ‘Biks û Zulfên Aştiyê’ hefteyek ji lîstikên şanoyê derbas kir. Festîvala bi dirûşma “Ji her bajarokî çîrokek û ji her dilekî romanek” îsal cara 4’emîn hate lidarxistin, 30’ê Cotmehê destpê kir û 4’ê Mijdarê bi dawî bû.
Li gel Rojavayê Kurdistanê û herêmên Bakur û Rojhilatê Sûriyeyê, ji Bakurê Kurdistanê jî şanoger beşdarî festîvalê bûn. Şanogerên ji Amedê beşdarî festîvalê bûn, hestên xwe ji ANF’ê re anîn ziman û diyar kirin ku siberojê wê têkiliyên xwe yên hunerî yên bi herêmê re xurtir bikin.
Şanoger Alvan Koçer kêfxweşiya xwe ya ji bo beşdariya li festîvalê anî ziman û diyar kir ku ciwanên niha xwedî zîrekiyeke mezin e, li ser dikê bi rengekî azad dikarin peyamên xwe bidin û got, “Em ê paşerojê êdî bi lîstikên xwe tevlî bibin. Dema ku Rojava rabû ser piyan, li Bakur jî em li ser piyan bûn. Ji xwe çanda me, zimanê me yek e û em yek in. Li Kobanê israra ciwanan a hunerê gelekî xurt e. Di nava şert û mercên herî zehmet de festîvalên bi vî rengî têne lidarxistin ku ev yek gelekî baş e û cihê hurmetê ye. Niha jî barê giran li ser me ye. Me ji bo zimanê xwe û hebûna xwe şer dikir, niha jî em ê bi çanda û hunera xwe bi pêş bikevin û sînoran rakin.”
Alvan Koçer bi bîr xist ku festîvalên şano yên li Bakurê Kurdistanê bi beşdariya komên ji Başûr, Bakur û Rojhilatê Kurdistanê pêk dihat, hingî tevlîbûna Rojava kêm bû, lê di dema pêş de wê dawî li vê kêmasiyê bînin.
Alvan Koçer got, “Bi hesta ku ji Bakur me li vê derê dinihêrî, niha em ji vê derê bi heman hestê li Bakur dinihêrin. Me dirûşmeyek ji xwe re li festîvalê afirandin. Ew jî bi vî rengî ye, ‘Ji her parçeyekî Kurdistanê çîrokek û di dilê her şanogerekî de romanek; em ê her tiştî baş bikin’. Gelek tiştên balkêş û enerjiyên xurt hene. Diyar e ku komên gelekî serketî û xurt wê ji Rojava derkevin.”
Şanoger Rêzan Kaya jî anî ziman ku wê gelekî meraq dikir ku li şanoya Rojava temaşe bike û got, “Gelek caran min li ser medya civakî didît. Lê min bi çavên xwe nedidît. Li kolanên Kobanê hînê em şer hîs dikin. Hevalên nû li vê derê nû dest bi şanoyê kirine wê di demên pêş de bibin pispor û karibin bibin dengê berxwedanê.”
Rêzan Kaya diyar kir ku ew êdî dikarin bên Rojava, tevlî perwerdeya şanogeran bibin û got, “Me pêşniyar kir ku werin vê derê û li peymangeha hunerê beşdarî perwerdeya xwendekaran bibin. Cihên ku li vir me ziyaret kir giraniyeke gelekî mezin xiste ser min. Ew hestewarî ne tenê hestewariyek e giran e, ew ê ji bo min bibe asta têkoşînê. Êdî em dibêjin êdî em dawiyê li rojên reş bînin.”
