Komîteya Rêveber a Tevgera Şoreşa Yekbûyî ya Gelan (HBDH) ev tişt got:
“Di serî de gelên Rojhilata Navîn, Newroza ku li gelek cihan tê pîrozkirin li tevahî gelên bindest pîroz be! Bibe wesîleya rizgarî, azadî, yekîtî û jiyana hevpar a gelan!
Newroz ji aliyê netewa Kurd ve weke rojeke rizgariyê tê pênasekirin. Weke mîtolojîk di serhildana rewa ya Kawayan a li dijî Dehaqên zalim de, wate dîtiye. Tenê weke hatina Biharê nehatiye nirxandin, weke têkoşîna civakî Newroz di destê bindestan de bûye çeka berxwedanê. Di gelek qonaxên dîrokê de weke meşaleyeke di destê bindestan de, heta roja me ya îro hatiye. Li zindana Amedê yek ji rêberên têkoşîna azadiya Kurd Mazlum Dogan bi meşaleya di destê xwe de tarîtiya zindanê û tevahî zextên dewleta Tirk a faşîst têk biriye. Ji ber vê wateya dîrokî, îro ruhê serhildanê yê Newrozê li tevahî Rojhilata Navîn zindî dibe.”
HBDH’ê diyar kir ku ji ber zilma sîstema emperyalîst a kapîtalîst hemû gel rû bi rûyê xeteriya şerekî cîhanê ne û ev tişt got: “Dewleta Tirk a faşîst êrîşên xwe yên li ser gelê me zêde dike, li aliyê din jî Rojhilata Navîn (Bi taybetî Rojava û Herêmên Parastinê yên Medyayê) û li Kafkasyayê li pey dagirkeriyên nû ye. Li Sûriyeyê rêxistinên cîhadîst/selefî yên ku Şam bi dest xistine, gelê Elewî qetil dikin.”
HBDH’ê ragihand ku zextên li Tirkiye û Kurdistanê li hemberî gel tên kirin, hêrsa gel zêde dike û got, “Ji hemû aliyan ve zext li ser jinan, netewa Kurd, Elewî û hêzên şoreşger-demokrat heye. Newroz hêviyê dide gelên bindest ên Rojhilata Navîn. Gelên ku hêviyê mezin dikin, wê siberojê bi dest bixin. Duh serhildana ku di şexsê Kawa de şênber bûye, îro di şerê gerîlayên azadiyê, berxwedanên li zindanan, di hemû eniyên berxwedanê yên li kolanan û Rojhilata Navîn hatî danîn de, belav dibe.
Newroz pîroz be!”
