Hevserokên Giştî yên Partiya Wekhevî û Demokrasiyê ya Gelan (DEM Partî) Tulay Hatîmogûllari û Tuncer Bakirhan li navenda giştî ya partiyê têkildarî pêvajoya çareseriya pirsgirêka Kurd û tayînkirina qeyûman daxuyanî dan.
Di daxuyaniyê de ji ewil Tulay Hatîmogûllari axivî û bertek nîşanî tayînkirina qeyûm a li Şaredariya Bajarê Mezin a Wanê da. Tulay Hatîmogûllari, tayînkirina qeyûm weke “derbe” pênase kir.
Tulay Hatîmogûllari, bi domdarî got ku her roj bi tundiya dewlet û îktîdarê re rû bi rû tên û ev tişt anî ziman: “Îro di danê sibehê de li Şaredariya Bajarê Mezin a Wanê qeyûm hate tayînkirin. Îroj ji rojan 15’ê Sibatê ye. 15’ê Sibatê ew roj e ku birêz Ocalan bi komployeke navneteweyî anîn Tirkiyeyê. Hûn kedkarên çapemeniyê her cara me dibînin vê pirsê dikin; gelo dê birêz Ocalan daxuyaniya tê payin bide dê di 15’ê Sibatê de bide yan na? Me jî her carê got ku heke amadekarî pê re bigehijin dibe ku were dayin lê îxtîmaleke mezin dê amadekarî pê re negihijin û dê piştre were dayin. Vaye di rojeke wiha ya sembolîk de li Şaredariya Bajarê Mezin a Wanê qeyûm hate tayînkirin.”
Di berdewama axaftina xwe de Tulay Hatîmogûllari ev tişt anî ziman: “Em dizanin ka heta niha AKP û qesr çawa dixebite. Em baş dizanin ku ew jî girîngiyê didin rojeke wiha ya sembolîk. Li vê derê em bi rêya we raste rast ji qesrê û Erdogan dipirsin; îro bi tayînkirina qeyûm a li Wanê re hûn dixwazin çi bikin? Gelo bi tayînkirina qeyûm hûn dixwazin pêvajoya diyalogê asteng bikin? di demeke ku li ser aştiyê tê axaftin û hêviya gel çêbûyî de gelo hûn dixwazin pêvajoya diyalogê asteng bikin?”
Bakirhan jî di axaftina xwe de wiha got: “Bi fermana wezîrê karên hundir qeyûm li îradeya gel hate tayînkirin. Bêdengbûn û qebûlkirina vê di kevneşopiya me de tune ye. Kevneşopiya me, kevneşopiya têkoşîna li dijî sepanên xespê û dijdemokratîk e. Hûn dê nekarin di hilbijartinê de têk bibin. Xelkê Wanê ku her 14 şaredarî qezenc kir, dê derseke mezin bide van polîtîkayên we yên qeyûmperest.
Sûcekî qet çênebûye, bi destê darazê weke sûc nîşan didin û ceza didin. Bi awayekî korsanî, bi rêbaza çetetiyê di nîvşevekê de bi bombeyên gazê, bi guleyên plastîk dê bi ser Şaredariya Wanê de bigirin. Dê rojnamegeran û gelê xwedî li îradeya xwe derdikeve binçav bikî û destên wan ji pişt ve kelemçe bikî. Piştrast bin ku dê tu kes vê xerabiyê, vê dijminatiyê ji bîr neke. Ev xerabî, ev dijminatî bi biryareke kompasê ya darazê nayê nixûmandin. Gelê Wanê ku her 14 şaredarî qezenc kir dê xwedî li îradeya xwe derkeve.
Binêrin, ji serê sibehê heta êvarê dibêjin ha teror ha teror. Ji bo xatirê Xwedê dixwazim di hizûra we de bangî gelên Tirkiyeyê bikim; xwedîderketina gel a li îradeya xwe ya ji sindoqê derketî çawa dibe teror? Birêz recep Tayyîp Erdogan di serdana xwe ya 3 rojan a derveyî welat de qaşo qala çareserî, demokrasiyê dikir. Di saetên hatî Tirkiyeyê de qeyûm hate tayînkirin. Ma dê baweriya kê bi van gotinên li derveyî welat tên kirin bê. Hûn li tayînkirina qeyûm a li îradeya gelê Wanê binêrin û biryara xwe bidin.
Em bang dikin ku jidil bin. Armanca we çi ye? Dema qala pirsgirêka Kurd hûn çi fêm dikin, hûn dixwazin çi bikin? Hûn bi rastî jî li gel çareseriyê ne, hûn dixwazin ev nîqaşên heyî derbasî qonaxeke çareseriyê bibe yan hûn hewl didin van jî bikin hincet û îradeya gel xesp bikin? Hinek zelal bin, bi merdanî bersivê bidin. Em careke din bi merdane dibêjin ku em li gel çareserî, aştî, demokrasî û muzakereyan e. Em niha dipirsin; weke îktîdarê hûn bi çi re ne? Hûn çi dixwazin û ev zîhniyeta we ya xespkar dê heta ku derê bidome? Li rexekî ev nêzikatiyên xespkar û çetetiyê û li rexa din çareserî nabe.
Ev rê ne tu rê ye. Ev rê dê li ser sindoqê li îradeya gel biqelibe. Mîna li Wanê dê her 14 şaredarî bên bidestxistin û hûn ê bibin partiya tabelayê. Em ê tevî hevserokên xwe û endamên MYK’ê demek şûnde biçin Wanê. Em ê bi gelê xwe yê Wanê re bin ku xwedî li îradeya xwe derdikeve. Em jî dê mîna wan bitêkoşin û li ber xwe bidin. Em ê vê xespê û derbeya siyasî qebûl nekin. Heta ku îktîdar ji dev ji vê zîhniyeta xwe ya xespkar ber dide em ê bi biryardarî têbikoşin.”
