Li gorî agahiyên ku lekolin.org’ê dane, di 18’ê Mijdara 2025’an de li çolistana 90 km li rojhilatê Palmîrayê (Tedmûr), li herêma Suxnê, civîneke veşartî di navbera heyeta Ewlekariya Giştî ya girêdayî hikumeta veguhêz, serçeteyên DAÎŞ’ê û eşîra xwecih a Bedû de hate lidarxistin.
Di civînê de, hêzên Ewlekariya Giştî ya girêdayî HTŞ’ê ku bi talîmatên rasterast ên MÎT’ê tev digerin, ji serçeteyên DAÎŞ’ê xwest li hemberî hebûna xwe ya li Sûriyeyê bidomînin, bi taybetî li herêmên Elewî, Durzî û Kurdan bombebaran û êrişên terorî pêk bînin. Her wiha hate gotûbêjkirin ku çeteyên biyanî yên DAÎŞ’ê yên wekî Ûygur, Çeçen û hwd li rojavayê gundewarên Humusê û li nêzîkî sînorê Lubnanê, li herêma El Qisêrê (15 km dûrî sînor) werin komkirin.
Li gorî çavkaniyan civîn ji aliyê fermandarê Lîwaya 74’an a girêdayî HTŞ’ê Amîd Cemîl El Salih ve hatiye organîzekirin. Navenda sereke ya lîwayê li gundê Deyr Şimêl ê li ser rêya Laziqiyê ya li bakurê rojavayê parêzgeha Hemayê ye. Deyr Şimêl wek baregeha lojîstîk û perwerdeyê ya lîwayê kar dike.
Ev lîwa bi giranî ji çeteyên biyanî pêk tê: Ûygurên ji rojhilatê Tirkistanê, Çeçen, Ûygurên çînî û çeteyên din ên bi eslê xwe kafkasyayî, hin jî Tirkmen in. Li nêzî bendava Deyr Şimêlê ji bo van çeteyên biyanî kampeke taybet heye.
Baregeha duyemîn a mezin jî li gundewarên Misyafê yê di navbera Hema û Humusê de ye, di avahiya ku berê serçeteyê Suhayl Hasan lê dima. Niha hate zanîn ku di wê avahiyê de serçeteyên DAÎŞ’ê yên bi eslê xwe urdunî têne komkirin.
Li gorî agahiyên ku lekolin.org’ê, di 18’ê Mijdarê 2025’an de hin serçeteyên DAÎŞ’ê yên payebilind bi rêyên taybet ji sînorên Urdun û Tirkiyeyê derbasî Sûriyeyê bûne û li herêmên di bin kontrola HTŞ’ê de ji bo civînê bi hikumeta veguhêz re kom bûne.
