Platforma Info Plus a Iraqî hinek agahiyên nihênî û metirsîdar eşkere kirin. Li gorî îdiayan, ev plan di civînekê beriya çend rojan de li Şamê hatiye danîn, ku tê de Keça Sedam Rexed Sedam Husên û Mihemed El-Colanî hatine cem hev. Her wiha tê behskirin ku ev plan di bin çavdêriya îstîxbarata herêmî û navneteweyî de ye û armanca wê ya rasterast Iraq û Libnan e.
Ev agahî di demekê de tên ku Wezîrê Karên Derve yê Tirkiyeyê, Hakan Fidan, hişyarî dabû ku dibe ku aloziyên li Sûriyeyê derbasî Iraqê jî bibin û daxwaz kiribû ku ders ji bûyerên Sûriyeyê bêne girtin.
AGAHIYÊN BALKÊŞ
Li gorî raporê, ev civîn di 16’ê Kanûna Paşîn de pêk hatiye û zêdetirî du saetan dom kiriye. Di civînê de behsa livandina şaneyên razayî yên li hundirê Iraqê, bikaranîna komên tundrew ên li ser sînor û berfirehkirina çalakiyan ber bi Libnanê ve hatiye kirin.
Koordînatorê Giştî yê Partiya Tehrîr a Neteweyî li Sûriyeyê Mehmûd Mewaldî diyar kir ku ev civîn bi serpereştiya îstîxbarata Brîtanyayê û bi cîbicîkirina îstîxbarata Urdunê pêk hatiye. Di civînê de efserên berê yên artêşa Sedam Husên û kesayetên ewlehiyê yên Sûrî û Ereb jî amade bûne. Armanc ew e ku Partiya Baas bi şêwazekî cîhadî û nûjen ji nû ve zindî bikin.
PLANA SAETA SIFIRÊ ÇI DIHEWÎNE?
Li gorî çavkaniyan, plan ji sê qonaxên sereke pêk tê:
Livandin û serîrakirina şaneyên veşartî; Piştî derbeyeke muhtemel a Amerîkayê li dijî Îranê, şaneyên Baasê yên li parêzgehên Sune yen Mûsil û Enbarê werin livandin û endamên DAIŞ’ê ji kampên Sûriyeyê derbasî hundirê Iraqê bibin.
Tevliheviya li Libnanê; Şandina hinek koman bo bajarê Trablûsê ya Libnanê da ku eniyeke nû li dijî Hizbullahê vekin û wê bidin sekinandin.
Hêza Baasî-Cîhadî; Yekkirina bermayiyên Partiya Baasê bi komên çekdar ên Colanî re, da ku saziyeke Baasî-Cîhadî ava bikin û Iraqê veguherînin qada şerekî giran.
Çavkaniyekî Sûrî piştrast kir ku parêzgeha Enbarê di serê armancên vê planê de ye. Tê gotin ku plan heye nêzîkî 40 hezar çekdar bi pêşengtiya efserên berê yên Baasî li Enbarê werin komkirin, da ku ji wir êrîşên berfireh bibin ser kûrahiya axa Iraqê.
Her wiha di raporê de bal tê kişandin ser peywendiya navbera van tevgeran û daxuyaniyên dawî yên Enqereyê; tê îdiakirin ku dibe ku Tirkiye jî di nava planeke berfireh de be ku nexşeya herêmê ji nû ve xêz dike.
