Di lêpirsîna kuştina rojnamevan, derhênerê belgefîlman û parêzvanê jiyanê Hakan Tosûn li Esenyurt de nezelalî zêde dibin. Piştî bûyerê heta 27 saetan malabata Tosûn nehat agahdarkirin. Tiştên wî pênc rojan ji aliyê polîsan ve hatin girtin. Sûcdar li şûna ku werin binçavkirin, tenê ji bo îfade dayînê çûne qereqola polîsan. Dîmenên Kamerayê yên herî zelal bûyerê dertîne holê ji aliyê bavê yek ji sûcdaran ve hatiye girtin. Ev rastî hemû nezelaliyê der barê bûyerê de zêde dike.
Her çend sedema bûyerê ne diyar be jî, di lêpirsînê de her roj skandalên nû derdikevin holê. Parêzerê malbata Tosûn Onur Cingil, têkildarê rêveçûna lêpirsînê ji ANF’ê re axivî û diyar kir ku kesê sêyemîn Yusuf Ozakdag ê ku di êrîşê de amade bû, piştî ku wekî “şahid” îfadeya xwe da hatiye berdan.
PÊŞÎ TOSÛN RASTÎ ÊRÎŞÊ DEVKÎ Û PIŞT RE FÎZÎKÎ TÊ
Hakan Tosûn di şeva 10’ê Cotmehê de, dema ku ber bi mala diya xwe ve diçû, li taxa Mehmet Akîf Ersoy a Esenyurt ji aliyê du kesan ve rastî êrîşê hat. Kamerayên ewlehiyê yên ne temam nîşan didin ku Tosûn li ser peyarêkê rûniştiye û pêşî bi devkî û dû re jî bi fîzîkî ji aliyê Abdurrahman Murat ê 18 salî ve rastî êrîşê hatiye. Xuya dibe Tosûn dikeve erdê, paşê radibe ser xwe û hewl da ku ji wir dûr bikeve.
Lê belê, Murat bi motorsîkletê li pey wî çû û careke din êrîşî Tosûn kir. Dema ku Tosûn ket erdê, BMW’yek reş gihîşt cihê bûyerê. Adnan Şahin ê 24 salî ji wesayîtê daket û bi derbkirinê Tosûn avêt erdê. Tosûn ji ber derbên ji serê xwe digire, bi ser hişê xwe ve diçe û li ber avahiyekê bêyî tevger dimîne.
LI GORÎ ŞAHIDAN AMBÛLANS PIŞTÎ SAETEK TÊ CIHÊ BÛYERÊ
Li gorî şahidekî bûyerê, ambûlans saetek şûnda gihîşt cihê bûyerê û li gorî qeydên polîsan 15-20 deqîqe şûnda hatiye. Tosûn, ku birin Nexweşxaneya Çam û Sakura ya Başakşehirê, hat tespîtkirin ku di encama derbê de xwîn çûye ser mejiyê wî. Lê belê, rastiya ku Tosûn li şûna ku di beşa lênêrîna giran de were razandin 2,5 saetan li beşa lezgîn hatiye ragirtin û di vê demê de ne diyar e ka wî dermankirina pêwîst wergirtiye an na.
POLÎS 5 ROJAN LI QEREQOLÊ TIŞTÊN WÎ VEDIŞÊRE, NASNAME Û KARTA ÇAPEMENIYÊ WINDA NE!
Polîsan bi hinceta wan nasnameya Hakan Tosûn tesbît nekirine, dereng piştî 27 saetan agahî dane malbata wî. Lê belê, paşê derket holê ku tiştên Tosûn ji aliyê polîsan ve li cihê bûyerê hatine birin. Piştî pênc rojan, malbatê bi polîsan re têkilî danî û hîn bû ku tişt li Midûriyeta Polîsan a Mevlana ya Esenyurt in. Wekî din, di van tiştên ku dereng hatine radestkirin de nasname û karta wî ya çapemeniyê tune bû.
DÎMEN ÎFADEYÊN SÛCDARAN VALA DERDIXE
Sûcdar Abdurrahman Murat û Adnan Şahîn bi tohmeta “birîndarkirina bi zanebûn” ji bo îfade dayînê çûne qereqola polîsan, lê nehatin binçavkirin. Di îfadeyên wan de hat îdîakirin ku Tosûn “serxweş bû, nifir li wan kiriye û êrîş kiriye.” Lê belê, dîmenên kameraya ewlehiyê yên berdest nîşan didin ku ev îdia bi tevahî bê bingeh in.
Yusuf Ozakdag, ku bi motorsîkleta xwe tevlî êrîşê bûye, wekî şahid îfade da. Lê belê, parêzerê malbata Tosûn Onur Cingil, destnîşan kir ku Ozakdag bi awayekî çalak tevlî êrîşê bûye û divê wekî sûcdar an jî wekî hevkar were darizandin.
‘EV DOZEKE KUŞTINA BI ZANEBÛNE’
Cingil, diyar kir ku vekirina dozê bi tohmeta “birîndarkirina bi zanebûn” şaşiyeke mezin bû û divê êrîş wekî hewldana kuştina bi zanebûn bihata hesibandin. Cingir got, “Hakan Tosûn wê demê têkoşîna jiyanê dida, lê wesfa êrîşê bi awayekî zelal armanca wê kuştin bû. Divê îdianame bê guman li ser bingeha ‘kuştina bi zanebûn’ were amadekirin.”
