Komeleya Mafên Mirovan (ÎHD) Nobeta Aştiyê ya di hefteya ewil a mehê de digire vê hefteyê jî domand. Nobeta ku li Şaxa ÎHD’a Enqereyê hate girtin bi boneya 1’ê Mijdarê Roja Kobanê ya Cîhanê hate girtin. Li eywana ku nobeta lê hate girtin pankartên “Em 1’ê Mijdarê Roja Kobanê pîroz dikin. Em di 1’ê Mijdarê Roja Kobanê de li dijî şer û pevçûnan mafê aştiyê diparêzin” cih girtin.
Endama MYK’ê ya ÎHD’ê Nûray Çevîrmen, anî ziman ku tevî zext û binçavkirinan weke ÎHD’ê parastina aştiyê didomînin. Çevîrmen a Roja Kobanê ya Cîhanê pîroz kir, wiha got: “Em bang li raya giştî dikin ku ji bo aşkerakirina binpêkirinên mafên mirovan ên li Kobanê û herêmên din ên DAÎŞ’ê êrişî wan kirin û berpirsyar derkevin holê, ji bo darizandina sûcê qirkirinê ya li Dadgeha Ceza ya Navneteweyî bikevin nava hewldanan.”
Hevserokê Giştî yê ÎHD’ê Huseyîn Kuçukbalaban ê piştre axivî, diyar kir ku Bakur û Rojhilatê Sûriyeyê mînaka bi hev re jiyana gelan e. Kuçukbalaban, diyar kir ku weke ÎHD 26 meh in banga aştiyê dikin û banga Serokê Giştî yê MHP’ê ya ji Rêber Apo re bi bîr xist û ev tişt hate gotin: “Hevkarê biçûk ê desthilatê ev yek anî ziman û Serokkomar jî bi lêv kir ku ev pêvajo dê wiha bimeşe. Meseleya aştiyê ne meseleyeke ku ji niyeta baş a desthilatan re bê hiştine.”
Kuçukbalaban, diyar kir ku ji bo avakirina aştiyê dixwazin bi saziyên sivîl ên civakê re bên ba hev û têkildarî vê yekê xebatên wan hene û ev tişt gotin: “Em dixwazin têkoşîna aştiyê bi çarçoveyeke ku bi me re ne sînordar e pêk bînin. Bêguman yek ji girîngtirîn stûnên vê pêvajoyê jî hevdîtina bi Abdullah Ocalan re ye ku ev 43 meh bûn pê re hevdîtin nedihate kirin û di nava tecrîdê de ye. Di peyama ji wir hat de diyar kir ku ji bo li Tirkiyeyê aştiya civakî bê avakirin ew ê di mijara muxatabiyê de peywîrê bigire. Ji bo ku Abdullah Ocalan hem bi rêxistina xwe re hem jî bi beşên civakî re hevdîtinê bike, em ê hewl bidin ku şert û mercan biafirînin.”
