Komên çete yên hikumeta demkî ya Sûriyeyê ku dewleta Tirk a dagirker destekê dide wan di navbera 6 û 10’ê Çileyê de li dijî taxên Şêxmeqsûd, Eşrefiyê û Benî Zêd ên Helebê êrişên dijwar pêk anîbûn û komkujî kiribûn, dîsa bi sedan kes revandin.
Bi destpêkirina êrişan re Heyva Sor a Kurd, ji bo alîkariya şênî û birîndaran ekîbek şandibû van taxan. Lê çeteyan 3 kes ji wan jî revandine.
Heyva Sor a Kurd roja 11`ê Çileyê ragihand ku agahî ji 3 endamên wan nayê girtin. Roja 12`ê Çileyê jî Hevya Sor navên endamên xwe yên ku agahî ji wan nayê girtin eşkere kirin û banga serbestberdanê kir.
Li gorî agahiyên Heyva Sor parve kirine, endamên hatine revandin ajokarê ambulansê Yûsif Henan Hamoko, hemşîre Ebdulrehman Ebdo Ebdo û berpirsyarê tîma bijîşkan Ramî Hisên El-Elî ye.
Têkildarî rewşa dawî û hewldanên ji bo serbestberdana kesên hatine revanidn, Rêveberiya Heyva Sor a Kurd agahî dan ANHA’yê. Li gorî rêveberiyê, bi gelek rêxistinên navneteweyî yên wekî Tevgera Xaça Sor û Heyva Sor a Navneteweyî (IRCRCM) pêwendî hatine çêkirin, ev saziyên hanê jî ketine nava tevgerê, lê hîn jî agahiyek zelal nehatiye bidestxistin.
Li gorî agahiyên Heyva Sor a Kurd, dema ku êrişan destpê kiriye, ekîbek wan a ji 5 kesap pêk tê, li nava taxan alîkariya şênî û birîndaran kiriye.
Di roja yekemîn de ekîba Heyva Sor li taxên Şêxmeqsûd, Eşrefiyê û Benî Zêd mudaxeleya lezgîn ji bo 17-18 birîndar kiriye û sewqî nexweşxaneyê kirine, di roja duyemîn de jî 9 birîndar sewqî nexweşxaneyê kirine.
Ekîba Heyva Sor a Kurd, di roja 3`yan a êrişan (8 Çile) de jî, heta saet 00:00`an li ser kar bûye, lê piştre re peywendiya bi wan re qut bûye.
Piştî demekê, di hinek dîmenên hatine belavkirin de, 2 endamên ekîbê yên di nava kesên hatine revandin de hatine dîtin. Lê agahî ji hersê endamên din nehatiye girtin. Rêveberiya Hevya Sor di vê navberê de hewl daye ku bi riya telefonê xwe bigihîne hersê endaman. Di lêgerînek telefona endamekî de kesekî ku bi Erebî di axive bersiv daye û gotiye, “Xwediyê vê telefonê li cem me ye, heke hûn bixwazin werin wî bibin.” Lê hiştre agahî qut bûye.
Derbarê herdû endamên din heta niha tu agahî nehatine bidestxistin.
