Li navçeya Hezex a Şirnexê ji bo gerîlayên HPG’ê Harun Sune (Şevger Rojger) û Remezan Çakarsin (Serbest) ên ku di demên cuda de di şer de şehîd bûn, konê sersaxiyê hatin danîn. Bi pêşengiya MEBYA-DER gelek siyasetmedar û nûnerên rêxistina civakî ya sivîl serdana konên sersaxiyê kirin.
Destpêkê li Taxa Turgut Ozal serdana konê sersaxiyê yê ji bo Remezan Çakarsin hatî danîn hate kirin ku sala 1998’an li navçeya Şax a Wanê di şer de şehîd bû. Parlamentera Partiya Wekhevî û Demokrasiyê ya Gelan (DEM Partî) Newroz Uysal Aslan li konê sersaxiyê axivî. Uysal bal kişand ser merasîma dîrokî ya Koma Aştî û Civaka Demokratîk û got, “Têkoşîna wan ji bo me mîrate ye. Ji bo em bibin layiqê heqîqeta wan, em ê têkoşînê mezin bikin.”
Kurê Çakarsin Egît Çakarsin jî wiha got: “Dema ku bavê min tevlî partiyê bû em zarok bûn, niha em bûn 35 salî. Em ê têkoşîna wan mezin bikin.”
Gel piştre li gundê Bafê çû serdana konê sersaxiyê yê ji bo gerîlayê HPG’ê Harun Sune hate danîn ku sala 2019’an li Dersimê di şer de şehîd bû. Beriya merasîmê meş hate kirin û bê navber dirûşmeyên “Şehîd namirin” û “Bijî Serok Apo” hatin berzkirin.
