Pêkhateyên bajarê Qamişloyê bi berzkirina dirûşmên “Şehîd namirin” herikîn bin konê sersaxiyê yê gerîlayê HPG’ê Mehmûd Xelef (Aydin).
Mehmû Xelef sala 1961’ê li bajarê Qamişloyê ji dayik bûye. Li Lîbyayê ku lê dixebitî dest bi rêwîtiya têkoşînê kir. Di sala 1992’yan tevlî refên gerîla dibe û di sala 1998’an de li herêma Behdînan de şehîd bû.
Li konê sersaxiyê deqeyeke rêz hat girtin û axaftin hatin kirin. Endamê Meclisa Malbatên Şehîdan Mihyedîn Şêxmûs sersaxî ji malbata şehîd re xwest û got: “Em deyndarên van şehîdan in ku bingehê şoreşa azadiyê danîn. Bi saya keda wan em îro di bin vî konî de civiyane. Bi saya wan YPJ û QSD’ê ava bûne.”
Şêxmûs ji bo serxistina pêvajoyê banga hevgirtina bi QSD’ê re li şêniyên Bakur û Rojhilatê Sûriyeyê kir û anî ziman ku Meclisa Malbatên Şehîdan soz dide ku dê şopdara rêya şehîdan be.
Endamê Meclisa Leşkerî ya Qamişloyê Kawa Gulo jî diyar kir ku şehîd Aydin ji pêşengên meşa azadî û şoreşa li dijî dewleta Tirk a dagirker bû û ev li gotinên xwe zêde kir: “Şehîd Aydin bê berdêl tev li meşa azadiyê bû da ku hebûn û nasnameya gelê Kurd biparêze û azadiya gel mîsoger bike.”
Kawa Gulo destnîşan kir ku berxwedana QSD’ê dê tevî hemû arîşeyan dewam bike û got: “Tirkiye behsa aştiyê dike, lê şer û gefên xwe didomîne. Di heman demê de hikumeta veguhêz a Sûriyeyê li ser xeta wê dimeşe.”
