Şervanê QSD’ê şehîd Erdal Wêran Şar (Îbrahîm Kanar) û endamê Hêzên Ewlekariya Hundirîn şehîd Reşîd Omer bi merasîmekê li Pakrewangeha Şehîd Xebat Dêrik hatin veşartin. Şervanên YPJ’ê şehîd Delîla Dersim, şervanên QSD’ê şehîd Egîd Serhed, Çiyager Amara û Derwîş Kurdistan jî hatin bibîranîn.
Girseya şêniyên tevî hêzên leşkerî cenazeyên şehîd Erdal Wêranşar û şehîd Reşîd Omer ji Nexweşxaneya Dêrikê wergirt û ber bi Pakrewangeha Şehîd Xebat ve bi rê ket.
Li pakrewangehê merasîmek hat lidarxistin. Piştî deqeya rêzgirtinê bi navê Meclisa Malbatên Şehîdan Sûad Mistefa axivî û diyar kir ku şehîdan civakeke demokratîk û azad ava kir û teror têk bir.
Di merasîmê de endamê Kongreya Îslama Demokratîk Waîl Derşewî jî anî ziman ku bi saya keda şehîdan herêma Bakur û Rojhilatê Sûriyeyê ewle û azad bûye.
Ji fermandarên QSD’ê Seîd Koçer jî axivî û got, dê parastina welat û gel bidomînin û destnîşan kir ku wan xeta şehîdan wek dibistanekê ji xwe re esas girtine.
Piştre nasnameyên şehîdan hatin xwendin û radestî malbatên wan hatin kirin. Cenazeyên şehîd Erdal Wêranşar û Omer Reşîd bi dirûşme û tilîliyên dayikan spartin axê.
Şervanê QSD’ê Egîd Serhed (Ehmed Omyak) 24’ê Çileya 2025’an di berxwedana Bendava Tişrînê de şehîd bûbû, şervanê QSD’ê Çiyager Amara (Aslan Kutlu) 26’ê Sibatê li Şedadê, Derwîş Kurdistan (Murad Dag) 16’ê Çileya îsal û Erdal Wêran Şar 25’ê Çileyê, şervana YPJ’ê Delîla Dersim (Nazan Agirman) jî 11’ê Çileya îsal li Bendava Tişrînê şehîd bûbûn. Endamê Hêzên Ewlekariya Hundirîn Reşîd Miheyedîn Omer jî 20’ê Cotmehê li Reqayê şehîd bûbû.
