Gelek siyasetmedar û nûnerên civaka sivîl tevlî daxuyaniya li ber avahiya Rêxistina Cizîrê ya DEM Partiyê bûn. Ji Hevserokatiya Şirnexê ya DEM Partiyê Taybet Bilgî diyar kir ku bûyer nîşaneya “zihniyeta dijberê aştiyê ye” û destnîşan kir ku xelkê Cizîrê xwedî li îradeya xwe derket.
Hevseroka Cizîrê ya DEM Partiyê Fîlîz Acu, bal kişand ser heqaret û gefa Amîrê Emniyetê Ozdur a li hemberî hevşaredaran û ragihand ku ev yek ji aliyê gel ve bi nerazîbûn hate pêşwazîkirin û hevşaredaran bername protesto kir û çûn.
Fîlîz Acu diyar kir ku li Şirnexê walîtî û emniyet ev demek dirêje helwesteke zextkar raber dike û got, tiştên qewimîne “pratîka dewletê ya ji dervey hiqûqê ye”. Acu bang kir ku lêpirsîna îdarî were vekirin û berpirsyar hesab bidin.
Parlamenterê Şirnexê yê DEM Partiyê Mehmet Zekî Îrmez jî diyar kir ku gefa li hevşaredaran hatî kirin, nayê qebûlkirin û got, ji bo pêvajo bi aştiyê bi encam bibe ew ê têkoşînê bidomînin.
Daxuyanî bi berzkirina dirûşmeya “Hevşaredar îradeya me ne” bi dawî bû.
