Daxuyaniya Hevserokatiya Konseya Rêveber a KCK’ê wiha ye:
“Ewladê şoreşger ê gelê Kurdistanê yê welatparêz hevrê Abdûrahman Hecî Ehmedî ji ber nexweşiyekê roja çûyî jiyana xwe ji dest da û em bi xemginî fêr bûn. Em him ji malbat, him ji gelê Rojhilat û hemû gelê Kurdistanê re sersaxiyê dixwazin. Bêgûman em ji ber wefata kesayetekî şoreşger ê ku jiyana wî tev bi têkoşînê derbas bûye gelek xemgîn in. Qet guman nîne ku wê bîranîna wî di têkoşîna me de bijî û wê bigihîje armancê.
Hevrê Hecî Ehmed, têkoşerekî bi kesayeta xwe ya sade, mutewazî û kedkariyê ve dihat zanîn bû. Taybetmendiyên wî yên herî girîng xwe bi temamî dabû azadiya gelê Kurd. Hest û têgihîştina welatparêziyê pir li pêş bû. Di tevahî jiyana xwe de ji xetê derneket. Negot kî çi dibêje û li pey xwe mêze nekir. Her tim li pêş xwe mêze kir û meşiya, pêşketin afirandinê esas girt. Qet guh neda tiştên ji rêzê. Her tim li hemberî xeta hevkar xwedî helwestek zelal bû. Bi wê sekna xwe ya zelal temsiliyeta xeta welatparêziya Kurd a sade, jidil û werek her tim serxist. Bi van taybetmendiyên xwe yên hevgirtî û dirûst hevalên xwe qet mahcup nekir. Jiyana wî her tim bi têkoşînê derbas bû. Hîn di temenê ciwantiyê de tevlî têkoşînê bû. Bi esas wergirtina xeta Qazî Muhamed a welatparêziyê tevlî têkoşînê bû û vê xetê temsil kir. Hevrê Hecî Ehmedî peşmêrgetî jî kir. Piştre Rêber Apo ji nêz ve naskir û ji fikrên Rêber Apo re eleqeyekî mezin nîşan da. Ev jî li ser wî û têkoşîna wî bandorek mezin hîşt. Bi hêza ku ji fikren Rêber Apo girt, bi awayekî hîn çalak û bi coş xebitî. Wek encamê welatparêziya xwe ya kûr yekîtiya netewî ya Kurd pir girîng didît. Dilê wî ji bo hemû Kurdistanê lê dida. Xeyala wî ya herî mezin çêbûna yekîtiya netewî ya Kurd bû. Ji bo vê her tim din nava hewldanan de bû. Di dawî de avabûna KNK’ê de bi awayek çalak cih girt û di vê oxirê de bû xwedî pêşketinek mezin.
Taybetmediya herî girîng a hevrê Hecî Ehmedî jî ew bû ku bêyî ku li cîhan binêre li her derê kar kir. Li ku derê karîba kar bike bêyî dudilî çû wê derê û kar kir. Çiyayên Kurdistanê yek ji wan cihan bû ku ji bo karkirinê hat. Dema ku li çiya xebitî, li ser pêşxistina têkoşîna şoreşgerî ya li Rojhilatê Kurdistanê rawestiya. Bi armanca pêşxistina têkoşîna li Rojhilatê Kurdistanê bi awayekî çalak di damezrandina PJAK’ê de cih girt û bi salên dirêj hevserokatiya PJAK’ê kir. Jiyanek wî yê wiha ya tijî kedên mezin û serkeftin çêbû. Bêguman ev jiyanek pir binirx e. Em bejna xwe li ber bîranîna wî ya hêja ditewînin. Em careke din sersaxî ji hevrêyên wî û gelê Kurd ê welatparêz re dixwazin.”
