Rêveberiya Xweseriya Demokratîk a Herêma Bakur û Rojhilatê Sûriyeyê bi boneya salvegera yekemîn a ketina rejîma Baasê (8 Kanûn 2024) daxuyaniyek weşand.
Di daxuyaniyê de kiryarên ku rejîma Baasê di dema desthilata xwe ya li Sûriyeyê pêk dianî hatin bibîrxistin û hate gotin, rejîma Baasê di dirêjiya serweriya xwe ya li Sûriyeyê de siyasetên paşguhkirin û despotîzmê dimeşand, îradeya azad a gelê Sûriyeyê, bi taybetî ya welatparêzên ku daxwaza demokrasî, guherin û avakirina welatekî pirrengî dikirin, diçewisand.
Rêveberiya Xweser diyar kir ku şerên bi salan ên li welat rû dan, mînake herî şênber a hişmendiya rejîma Baasê ye û wiha domand “Rejîmê bi rêbazên herî hişk bersiva daxwazên gelên Sûriyeyê yên azad û rûmetê dida. Di dirêjahiya pêvajoya serweriya rejîmê de girtin, windakirin û nîjadperstî, olperestî, jihevbirina civakê û talankirina welat serwer bûn.”
Rêveberiya Xweser salvegera yekemîn rûxandina rejîma Baasê li malbatên şehîdan, tevahî pêkhane û mezhebên li welat dijîn pîroz kir û got: “Ketina rejîma Baasê ji bo Sûriyeyan xewnek bû ku bendewariya wê dirêj kir. Bi pêkanîna vê xewnê re ev roj bû sembola serketina îradeya gelan, bû şahiyeke girse ku hêviyên ber bi siberojeke adilane ve îfade dike.
Çûna wê rejîma despotîk gaveke girîng ber bi pêkanîna hêvî û armancên gelê Sûriyeyê ve bû. Lêbelê, rêya herî girîng û dirêj hîn jî li pêşiya me ye: xebata cidî ya avakirina Sûriyeyeke demokratîk, azad û nenavendî hewce dike, ku tê de maf werin parastin, cudahî werin rêzgirtin, zordarî, neheqî û bêparîkirin werin rakirin. Ev qonaxa dîrokî di rêya Sûriyeya nû de ya herî xeternak û hesas e ku hişyariya neteweyî, nêrînek yekgirtî û çalakiyek hevgirtî dixwaze.
Gavên ku hikumeta veguhêz a Sûriyeyê di salekê de avêtin cewhera daxwazên Sûriyeyan, rastiya wan û hêviyên wan îfade nake. Di vê çarçoveyê de ji diyaloga nîştimanî bigire heya avakirina hikumetê û hilbijartinên vê dawiyê yên parlamentoyê nûnerên hemû beşên Sûriyeyê û pêkhateyên wê negirt nava xwe. Zêdetirî vê yekê komkujiyên li herêma peravê û Siwêydayê hatine kirin rêgezên yekitiya nîştimanî şikandin û bûn sedema parçebûna xeternak a civakê, di heman demê de gotinên nefretê, provokasyon û tundrawî pêş xistin.”
Di daxuyaniyê de hate destnîşankirin ku nêzîkatiyên hikumeta veguhêz ên dûrxistina hêzên nîştimanî, nebûna şefafiyetê, girtina biryarên yekalî û paşguhkirina îradeya gel pir nêzî yên rejîma Baasê ne.
Di dawiya daxuyaniyê de wiha hate gotin: “Qonaxa niha ji hemû aliyên Sûriyeyî û civaka navneteweyî hewce dike ku hewldanên xwe zêde bikin û hêzên xwe bikin yek da ku Sûriye bibe çirayek rastîn a azadî, demokrasî, edalet û wekheviyê. Bi vê boneyê em bang li hikumeta veguhêz dikin ku siyasetek nîştimanî ya berfireh û beşdar esas bigire ku da avakirina welatekî nû hêjayî hemû Sûriyeyê garantî bike. Divê ev yek bi rêya destpêkirina diyalogek nîştimanî ya berfireh û cidî di navbera hemû nûnerên gelê Sûriyeyê de, misogerkirina vegera ewle ya koçber û penaberan û aktîfkirina mekanîzmayên bilez ji bo bidestxistina armancên gelê Sûriyeyê di hemû waran de bê kirin.”
