Êrîşên dagirkeriyê û qirkirinê li ser şoreşa Rojavayê Kurdistanê her diçe zêdetir dibe, çeteyên HTŞ û dewleta Tirk a dagirker ev zêdetirî 10 rojane bi armanca dagirkirina Bakur û Rojhilatê Sûriyeyê û tunekirina projeya Rêveberiya Xweser êrîşên dijwar pêk tînin. Li dijî êrîşên ku tên meşandin, şêniyên ji bajarê Kobanê yên kantona Firatê ya Herêma Bakur û Rojhilatê Sûriyeyê, nerazîbûn nîşan dan û amadekariyên xwe yên ji bo parastina rumet û axa xwe anîn ziman.
Dayîka bi navê Zêno ya ji Gundê Bîrerebê axivî û got, “QSD hebûna me ye. Em ê heta dawiyê li pişt zarokên xwe bin û yek jî ji me mabe em ê xwedî li nirxên şervanên xwe û şehîdên xwe derbikevin.
Me bi hezaran şehîd dan, hemû dewlet li dijî me rabûne, em jî xwediyê vê axê û vî milkê xwe ne. Me bi derziyê bîr kolan û ji wê bîrê xwîna zarokên me derket û me parçeyek ji kezebên xwe dan. Ev hemû şervanên me niha zarokên me ne. Heta dilopa xwîna xwe ya dawî em ê li ber xwe bidin. Em ji mirinê mezintir in, êdî Kurd ne Kurdên berê ne, ev axa pêşiyên me ye û em ê xwedî li vê axa xwe derbikevin.”
Dayîka bi navê Selwa Nasan a ji gundê Qeremoxê jî ev tişt anî ziman, “Em bi ser ketine. Weke dayîkên şehîdan em hemû bi şervanên xwe yên QSD’ê re ne, çi dikin bila bikin em hemû bi şervanên xwe re ne û ew çi dikin bila bikin em li pişt hêza xwe ne. Em li pey zarok û şervanên xwe ne. Em bi hezaran hene û em ê rabin ser piyan. Banga me ji her çar parçeyên Kurdistanê re ew e ku divê êdî rabin. Em bang li parêzvanên mafên mirovan dikin ku êdî li hemberî van qetilkirinan rabin. Weke dayîkên şehîdan em ê jî çeka xwe rakin û rabin ser piyan.”
