Konferansa Yekemîn a Jinên Kurd li Rojava bi dirûşma “Bi Pêşengiya Jinên Kurd Yekitiya Neteweyî ya Kurd Misoger Dibe” bi beşdariya 300 jinan li hola bexçeyê Azadî ya li bajarê Qamişlo hat lidarxistin. Konferans bi eşkerekirina encamnameyê bi dawî bû.
Encamname bi zimanê Kurdî û Erebî ji aliyê endama Komîteya Amadekar û Berdevka Têkilî û Tifaqên Demokratîk a Kongra Starê Rihan Temo û çalakvana siyasî û endama KNK’ê Ebîr Hesaf ve hate xwendin.
Encamname wiha ye:
“Konferansa Neteweyî ya Jinên Kurd a Rojavayê Kurdistanê, di bin dirûşmeya “Bi Pêşengiya Jinên Kurd Yekîtiya Netewî ya Kurd Misoger Dibe” de, îro bi amadebûna 300 jinên ji hemû herêmên Rojava û Sûriyê, nûnerên partiyên siyasî yên Kurd, meclîsên jin, saziyên Rêveberiya Xweser, rêxistinên civaka sivîl ên jin û hejmarek kesayetên siyasî, civakî û rewşenbîr hat lidarxistin.
Konferansa me, herî zêde li ser zehmetiyên ku jinên Kurd di qada siyasî de rastê tên, bi taybetî neyîniyên sîstema dewleta netewe ya bi hişmendiya zilam û hegemonya baviksalar rawestiya. Her wisa bal kişand ser rewş û girîngiya rola jin ku pêwîst e bi awayekî çalak beşdarî xebatên avakirina civaka demokratîk bibe, ji bo azadî, wekhevî û edalet li herêmên me pêk were.
Konferansa me wek mijareke esasî, li ser destûra nû ya vê dawiyê ji aliyê hikûmeta demkî ya Şamê ve hatî îlankirin, rawestiya. Di vê der barê de helwesta jin zelal e ku di vê destûrê de mafên jin bi tevahî hatine redkirin, heta rê vedike ku jin bêhtir bi qanûnên şerîetê were berbendkirin. Li hember vê xeteriyê konferansa me eşkere kir ku ji bo li Sûriyê giştî pêvajoyeke aştî, aramî û ewlekariyê pêş bikeve, jinên Kurd amade ne mil bi milê hemû jinên Sûriyê beşdarî xebatên avakirina Sûriya demokratîk û nenavendî bibin. Heman demê beşdarên konferansê li ser fedakariyên mezin ên gel û jinên Kurd li hemberî şer, êrîş û dagirkeriyên ji aliyê tevgera terorê DAIŞ`ê, dewleta Tirk û rejîma Baas`ê ve li ser herêmên me hatibûn sepandin jî rawestiyan û bi girîngî îfade kirin ku gelê me ji bo parastina ax, rûmet û nasnameya xwe ked û berdêlên giran dane, destkeftiyên mezin qezenç kirine. Ji bo parastina van destkeftiyan divê jin bêhtir giraniya xwe bidin xebatên parastin, ewlekarî û aramiya herêmê. Cardin Konferansê bal kişand ser rola pêşeng a jina Kurd di serkeftina Şoreşa Rojavayê Kurdistanê de, hêza jin a di pêşketina sîstema demokratîk a Bakur û Rojhilatê Sûriyê de.
Li ser vê bingehê beşdaran diyar kirin ku hêza birêxistinkirî ya jin a li herêmên Bakur û Rojhilatê Sûriyê, ji bo di tevahî Sûriyê de sîstemek demokratîk, ekolojîk û azadiya jin pêk were, pêwîst e di nav hemû qad û xebatên siyasî, civakî, aborî, perwerde, parastin û hwd. yên avakirinê de cih bigire, rêxistinên xwe yên xweser bi pêş bixe, yekitî û hevgirtina jinan xurttir bike. Çawa ku jinan bi ked, hewldan û îradeya xwe ya azad welê kirin ku di Hevpeymana Civakî ya Rêveberiya Xweser de mafên jin bên parastin û garantîkirin, di hemû qadên jiyanê, avakirinê û rêvebirinê de roleke pêşeng bilîzin, ev ji bo Sûriya nû jî modela çareseriyê ya herî guncav e.
Konferansa me, prensîbên ku jinên Rojava di vê pêvajoya dîrokî ya jinûve avabûna Sûriyê de li ser kar bikin jî bi girîngî rawestiyan û biryarên pêwîst girtin. Weke encam biryarên 1. Konferansa me ya Jinên Kurd a li Rojavayê Kurdistanê ev in;
1-Konferans bangewazî li tevahî hêz, rêxistin, partî û kesayetên siyasî yên Kurd dike ku di vê pêvajoya girîng a em nêzî azadiyê bûne de bilez Kongreya Netewî ya Kurdistanê ku hêvî û daxwaza hemû civak û jinên Kurd e, lidar bixin.
2-Konferans bang li rêxistinên jin ên her çar beşên Kurdistanê dike ku 3. Kongreya Neteweyî ya Jinên Kurd li Rojavayê Kurdistanê lidar bixin. Ji bo lidarxistina vê Kongreyê, wana vedixwîne Rojavayê Kurdistanê.
3-Yekrêziya nêrîna siyasî ya Kurdan ji bo çarenûsa gelê Kurd li Sûriyê ku xwediyê girîngiyek mezin û dîrokî ye, Konferansa me ji bo lidarxistina Kongreya Netewî ya tevahî hêzên Kurd li Sûriyê beşdar bibin, jinên Kurd jî bi rola xwe ya pêşeng û çalak tê de cih bigirin, bang li tevahî hêzên siyasî yên Kurd ên pêwendîdar dike.
4-Konferansa me, destûra demkî ya Şamê red dike û hikûmeta demkî ya Şamê vedixwîne ku li gorî Biryara Navnetewî 2254’ê ku daxwazeke giştî ya civakê û jinan e, tevbigere.
5- Avakirina Sûriyeke Demokratîk, nenavendî û pirrengî hem armanca sereke ya hemû pêkhateyên Sûriyê ye, hem jî garantîkirina mafên jinê ye. Konferans tekez dike ku projeya Rêveberiya Xweser ji bo çareserkirina tevahî pirsgirêk û aloziyên Sûriyê modela herî guncav e.
6-Konferans tekez dike ku beşdarbûna jinan di hemû pêvajoyên diyalogê yên Sûriyê de, ji bo avakirina Sûriya Demokratîk divê ne kêmî ji %50 be.
7-Konferans tekez dike ku bendên ji bo mafên jin di hevpeymana civakî ya Bakur û Rojhilatê Sûriyeyê de hatine bicihkirin, ji bo destûra nû ya Sûriyê jî esas bên girtin.
8-Xebata hevbeş bi hemû jinên ji pêkhateyên Sûriyê re û pêşxistina îtifaqên demokratîk ji bo parastina mafên jin û garantîkirina wê di destûra nû ya Sûriyê de.
9-Konferans tekez dike ku xwe parastina rewa ji bo hemû jinan hem erk e, hem jî mafekî rewa ye.
10-Hemû jinên Kurd bi rêya rêxistinên xwe di têkoşîna li hemberî hemû cureyên şîdetê û qirkirina jinan li Sûriyê de rolek pêşeng bilîzin, piştgirî û alîkariya pêwîst bidin û ezmûnên jin ên Bakur û Rojhilatê Sûriyê bi jinên hemû herêmên Sûriyê re parve bikin.
11-Konferans tekez dike ku pêwîst e di hemû qadên siyasî, aborî, rêvebertiyê û hwd. de perwerdekirin û pêşxistina jinan berdewam bike.
12-Konferans tekez dike ku ji bo hemû penaberên Efrîn, Girê Spî, Serêkaniyê, Şehba û herêmên din, bi ewlehî û bi xwestek vegerin warên xwe, divê hewldan û xebatên pêwîst bên meşandin. Her wisa hemû kesên ji ber dagirkerî û binpêkirina mafan mexdûr bûne, divê bi edalet bên tazmînkirin.
Van biryarên Konferansa me, ji bo bilindkirina asta têkoşîna jinan û xurtkirina rola jin di hemû qadan de, ji bo yekkirina kar û xebatên jin, ji bo pêkanîn û çêkirina nêrîneke siyasî ya hevbeş a hemû Kurdên Sûriyê, ji bo bicihkirina demokrasî û edaleta civakî dibin nexşerêyek.
Em weke hêza jin a konferansê tekez dikin ku em ê van xebatên xwe, heya asta yekîtiya netewî ya gelê Kurd li Rojava û giştî Kurdistanê pêk were, hevgirtina jin di hundirê Kurdistanê û derveyî welat de xurt bibe, berdewam bikin. Ji bo hemû kar û xebatên li ser bingeha avakirina Sûriyeke demokratîk, nenavendî, misogerkirina mafên jin û hemû pêkhateyan em ê piştgiriya pêwîst raber bikin. Bi vê bi vê biryardarî û baweriyê em silavên xwe ji bo hemû jinên têkoşer, kedkar ên Rojava, Kurdistan û Cîhanê dişînin. Em tekez dikin ku birêxistinbûn û yekîtiya jinan ji bo pêkanîna azadî û demokrasiyê rêbaza sereke ye.”
