103 sal li ser Peymana Lozanê derbas bûn ku ji bo Kurdistanê tê wateya parçekirin û tunekirina statuya siyasî. Rêber Apo Lozanê weke “Ji bo Kurdan şkestin” pênase dike. Hewldanên bê statuhiştinê, piştî Tevgera Azadiyê êdî bi temamî wateya xwe tune kir.
Hewldana tunekirinê ya bi Peymana Lozanê dihate xwestin, di sala 103’yan de bêwate bû. Bi gotina Rêber Apo, “Kurd ji sehpaya îdamê, hatin pêvajoya li ser maseyê birûnin.”
Parlamenterê Amedê yê DEM Partiyê û Hevberdevkê Înîsiyatîfa Yekîtiya Demokrat Mehmet Kamaç têkildarî wateya Peymana Lozanê, xebatên yekîtiya neteweyî ya navbera Kurdan û Pêvajoya Aştî û Civaka Demokratîk ji ajansa me re nirxandin kir.
Kamaç diyar kir ku Kurd bi Lozanê ji rojeva navneteweyî tên xistin û got, “Beriya sedsalekê di dema Şerê Cîhanê yê Yekemîn de li ser maseya dîplomasiyê ya dîzayna Rojhilata Navîn rojeva sereke Kurd bûn, di wê demê de Kurd bi Peymana Lozanê ji rojeva navneteweyî hatin xistin. Nuqteya destpêkê ya polîtîkayên înkar, îmha û asîmîlasyonê yên li hemberî Kurdan, Lozan e. Ji vî alî ve ev sed sal in Lozan tê nîqaşkirin.”
‘TÊKOŞÎNA AZADIYÊ YA KURDÊN KU LI LOZANÊ JI ROJEVÊ HATIN XISTIN, NEQEDIYA’
Kamaç destnîşan kir ku têkoşîna azadiyê ya Kurdên ku li Lozanê ji rojevê hatin xistin ti carî nesekinî û neqediya û anî ziman ku di têkoşînê de tişta kêm yekîtiya neteweyî ye. Kamaç ragihand ku Rêber Apo li aliyekê pêvajoyê dimeşîne, li aliyê din jî bal dikişine ser girîngiya yekîtiya neteweyî.
Kamaç bilêv kir ku ew xebatên ji bo yekîtiya neteweyî, didomînin û bi hemû dînamîkên Kurdistanê re di nava peywendiyê de ne.
‘PÊVAJOYA AŞTÎ Û CIVAKA DEMOKRATÎK JI BO YEKÎTIYA NETEWEYÎ QONAXEKE DÎROKÎ YE’
Kamaç diyar kir ku Pêvajoya Aştî û Civaka Demokratîk ji bo yekîtiya neteweyî qonaxeke dîrokî ye û got, sîstema beriya 100 salan hatî danîn, encex bi yekîtiya neteweyî dikare were derbaskirin.
Kamaç ev tişt jî got, “Di encama têkoşîna azadiyê ya gelê Kurd a bi sedan salan de, pêvajo û maseya muzakereyê destpê kir. Pêvajo pêşiya yekîtiya neteweyî vedike, yekîtiya neteweyî jî wê destkeftiyên Kurdan ên ji bo pêvajoyê mezin bikin.”
