Kongreya Civakên Demokratîk ên li Ewropayê (KCDK-E) bi peyamekê Cejna Çarşema Serê Nîsanê (Çarşema Sor) pîroz kir.
Di peyama KCDK-E’yê de hêvî û bendewariya aştî, statu û azadiyê ji bo civaka Êzidî hate kirin û hate gotin, “Êzidî ku bawerî û çanda herî kevnar a Rojhilata Navîn e, di dîrokê de rastî sirgûn û komkujiyan hatiye. Îro jî gefên li ser bawerî, hebûna neteweyî û çandî ya Kurdên Êzidî dewam in. Hikûmeta Iraqê di vê meha pîroz a gelê me yê Êzidî de gef û êrîşên xwe didomîne.”
Di peyamê de işaret bi gefên dewleta Tirk ên li ser Şengalê jî hate kirin û banga parastina çand û ola Êzidiyan hate kirin.
Peyama KCDK-E’yê bi vî rengî dewam kir:
“Bi boneya vê cejnê divê hemû sazî, bawerî û raya giştî ya Êzidiyan berpirsyariya yekitî û rêxistinbûnê bigrin ser milê xwe û bi hembêzkirina Şengalê li her derê berxwedanê mezin bikin da ku yekîtiya Êzidiyan pêk were û statu û avakirina Şengalê pêk were.
Divê hemû Kurdistanî û dostên wan ên li Ewropayê, ji bo têkoşîna hebûna gelê me yê Êzidî bigihêje statuyekê, divê bi awayekî aktîf xebatên xwe bimeşînin. Ji bo ku Şengal bibe xwedî statu, divê li gelek deverên Ewropa û cîhanê bi çalakiyên dewlemend dîplomasî bê kirin. Wezîfeya me ya bingehîn e ku em bi dubarekirina vê yekê ji gelên cîhanê re careke din gavên bi bandor bavêjin.
Weke KCDK-E em Cejna Çarşema Sor li gelê xwe yê Êzidî pîroz dikin û hêvî dikin ku ev cejn ji gelê me yê Êzidî û hemû Kurdan re bibe sedema aştî, statu û azadiyê.”
