KCK’ê bi peyamekê Serokkomarê nû yê Iraqê Nizar Amêdî pîroz kir û got, “Em di wê baweriyê de ne ku Birêz Nizar Amêdî wê ji bo demokratîkbûnê hewl bide ku bendewariya bingehîn a gelê me û gelên herêmê ye.”
Peyama KCK’ê bi vî rengî ye: Birêz Nizar Amêdî ji bo Serokkomariya Iraqê hate hilbijartin. Em ji ber vê yekê wî pîroz dikin û serketinê jê re dixwazin. Hêvîdar in ku ev yek hem ji bo Iraqê, hem jî ji bo gelê Kurd û herêmê bibe wesîleya xêrê.
Kurdistan û herêma me Rojhilata Navîn di pêvajoyeke girîng de ne. Birêz Nizar Amêdî di pêvajoyeke bi vî rengî krîtîk de dest bi wezîfeyeke girîng kir. Bêguman hilbijartina ji bo wezîfeyeke welê girîng berpirsyariyeke mezin jî bi xwe re tîne. Li Iraqê pirsgirêkên girîng hene. Şer, têkoşîna hêz û berjewendiyê ya li Rojhilata Navîn pirsgirêkên li Iraqê hîn giran dikin.
Pirsgirêkên gelê Kurd û hêviya wan a çareseriyê hene. Gelê Kurd di encama pêvajoyeke dirêj û berdêlên giran de ji aliyê civakî û siyasî ve pêşketinên mezin bi dest xist. Gelê Kurd veguherî hêza herî dînamîk a demokratîkbûnê û gelê polîtîk û rêxistinbûyî yê Rojhilata Navîn. Çareseriya siyasî demokratîk a pirsgirêka Kurd wê xizmetê ji çareseriya pirsgirêkên li herêmê re jî bike. Ji xwe kilîda çareseriya pirsgirêkên Iraqê û Rojhilata Navîn demokratîkbûn e. Bi têrkerî ispat bûye ku li Rojhilata Navîn tenê bi demokratîkbûnê pirsgirêk dikarin bêne çareserkirin û rêbazên li derveyî vê yekê nikare çareseriyê bi xwe re bîne. Şer, înkara ku dibe sedema êşên giran, neteweperestî, mezhebperestî, tekperestî pirsgirêkan hîn girantir dikin. Demokratîkbûn rêya çareseriya vê ye û bendewariya bingehîn a gelên herêmî jî ev e.
Em di wê baweriyê de ne ku Birêz Nizar Amêdî wê ji bo demokratîkbûnê hewl bide ku bendewariya bingehîn a gelê me û gelên herêmê ye. Bi van hêvî û bendewariyan, ji ber hilbijartina ji bo wezîfeyê em careke din wî pîroz dikin.”
