Koordînasyona KJK’ê, diyar kir ku Newroza îsal destpêkirina pêvajoyek nû a têkoşînê ye û destnîşan kir ku di dema pêş de wê dirûşmeya ‘Rêbertiya Azad û Civaka Demokratîk’ a Newrozê hê bêhtir bilind bibe û bibe dirûşmeya têkoşîna serkeftinê.
Koordînasyona KJK’ê, bi wesîleya Cejna Newrozê daxuyaniyeke nivîskî weşand. KJK’ê, di daxuyaniya xwe de diyar kir ku ew cejna Newrozê bi bawerî û biryardariya banga ‘Aştî û Civaka Demokratîk’ a Rêber Apo pêşwazî dikin û got, gelê Kurd ji destpêka meha Adarê û vir ve li Rojhilat, Başûr, Rojava û Bakûrê Kurdistanê û derveyî welat agirê Newrozê geş kirine û bi coşeke mezin dîlana azadiyê digerînin.
KJK’ê, roja azadî û vejînê cejna Newrozê li Rêber Apo, şehîd, gerîla, jin, ciwan û hemû gelan pîroz kir û got, “Ev Newroz, ronesansa gelê Kurd, gelên Rojhilata Navîn û jinan e. Em di wê baweriyê de ne ku gelê me wê vê Newrozê bi destpêkirin û hişmendiya têkoşîneke nû ku tê de serketineke mezin bi dest bixe, bi encam bike.”
ROLA PÊŞENGIYÊ LI GELÊ KURD HAT BARKIRIN
Koordînasyona KJK’ê daxuyaniya xwe bi vî rengî dewam kir: “Gelê Kurd ê ku beriya 2637 salan bi pêşengiya Kawayê Hesinkar li qontarên çiyayên Zagrosê agirê azadiyê pêxist û serî li ber koletiyê rakir û rizgariya xwe bi têkbirina Dehaqê zalim re şênber kir, ji bo rizgariya tevahiya gelên Rojhilata Navîn bû wesîle. Piştî 2637 salan dîrokê heman rola pêşengiyê li gelê Kurd bar kir û rizgariya gelê Kurd veguheriye rizgariya gelan û jinan. Ji bo vê jî banga ‘Aştî û Civaka Demokratîk’ ya Rêber Apo weke hêviya jiyana azad a nû li Kurdistan, Rojhilata Navîn û cîhanê hate pêşwazîkirin.
REJÎMA QIRKER BI KUŞTINÊ BERSIV DA
Hêzên rejîma qirker bersiva gelê me yê ku Newrozê bi coşek mezin û têkoşîna aştiyê pêşwazî kir, bi komkujiya li Kobanê re hat dayîn. Komkujiyên ku berê di meha Adarê de li Helebce, Taxa Gaziyan, Qamişlo û Efrînê hatin kirin, îro jî li ser gelê me tên ferzkirin. Dewleta qirker mirin û tinekirinê li ser gelê me ferz dike. Divê em xwedî li bîranîna gelê xwe yê hatine qetilkirin derkevin. Divê em layiqî berdêlên ku şehîdên me dane bin. Rêya vê jî rast fêmkirina têkoşînê û tevlîbûna wê ye. Bi vê boneyê em şehîdên Komkujiya Helebce, Qamişlo, Taxa Gazî, Efrîn û Kobanê bi bîr tînin û diyar dikin ku heta hilweşandina rejîma qirkir em ê têkoşîna xwe bi biryardarî bidomînin.
BI PÊŞENGIYA ARTÊŞA ŞEHÎDAN Û QEHREMANAN
Newroz vejînek e ku siberojê bi kokên rabirdûyê hembêz dike. Newroz di nava zehmetiyan de her tim xwe nû dike, bi nûkirinê re jinû ve ava dibe û bi jinûve avakirinê re jî bêdawî dibe. Sembola xwegihandina ronahiyê ya ji tarîtiyê ye. Agirê berxwedanê yê bi gelê me re, di pêşengtiya Rêber Apo de di pêşengtiya artêşa me ya qehreman û şehîdên mezin de li ser esasê ku hebûna xwe bi rastiya jiyaneke bênavber û bêdawî ya 52 salan tacîdar bike heta roja me ya îro hatiye. Bi vê wesîleyê em şehîdên xwe yên Newrozê Mazlûm Dogan, Zekiye Alkan, Rahşan Demîrel, Bêrîvan-Ronahî û Sema Yuce bi minetdarî bi bîr tînin.
AVABÛN Û VEJÎNEK NÛ
Rêber Apo jiyana xwe weke ji nû ve vejîna civak û jinê girt dest û rastiya kesayeta Newrozê û gel ava kir. Li dijî jiyana şaş a li ser van xakan tê ferzkirin, bi rastiya Newrozê re ku felsefeya vejînê ye, jiyana rast ava kir. Newroz li dijî koledariyê azadî ye, li dijî tinekirinê hebûn e û ev rastiya me ye. Em di pêvajoyeke mezin a dîrokî re derbas dibin. Rêber Apo bi manîfestoya xwe ya ‘Aştî û Civaka Demokratîk’ paradîgmaya înkar û tinekirinê şikand û têkoşîn derbasî qonaxeke nû kiriye. Hebûna gelê me di asta herêmî û navneteweyî de da qebûlkirin. Çareseriya pirsgirêkên azadî û ewlekariyê derbasî qonaxeke nû kir. Bi statuya civaka demokratîk re dînamîka herêmî û gerdûnî ya çareseriyê ava kir. Ev destpêka Newroz û vejîneke dîrokî ya nû ye.
SERDEMA CIVAKA DEMOKRATÎK
Di vê wateyê de Newroza ku em pêşwazî dikin, destpêka pêvajoyeke nû ya têkoşînê ye. Serdema avakirina sîstema Civaka Demokratîk a li ser bingeha yekîtiya azad û wekhev a jinan, gelan, baweriyan û hemû bindestan a li dijî sîstema netewe-dewletê ya yekparêz e. Têkoşîn armanc dike ku ji herêmî heta gerdûnî, ji gerdûnî heta herêmî cîhaneke azad ava bike. Armanc dike ku Rojhilata Navîn û cîhanê bi hişmendiya azadiyê bi têgihiştina gelên azad û neteweyên demokratîk teşe bigire.
DIRÛŞMEYA SERDEMA NÛ
Heta zîhniyeta ‘serhildanên Kurdan bitepisînin-Rêberên wan tine bikin’ yên ku rê li ber hilweşîna têkiliyên Kurd û Tirkan vekiriye neyê derbaskirin, ne pêkan e ku aştiya herêmî û cîhanî pêk were. Gelê me li dijî Komploya 15’ê Sibatê bi dirûşmeya “Hûn nikarin Roja me Tarî Bikin” li ber xwe dan û rastiyan derxist holê. Îro azadiya fîzîkî ya Rêberê me armanca herî girîng û îfadeya herî şênber a çareseriyê ye. Dirûşmeya Newrozê ya ‘Rêbertiya Azad-Civaka Demokratîk’ wê bibe dirûşmeya têkoşînê ya ku wê di dema pêş de hîn bêhtir mezin bibe û bi ser bikeve.
BANGA GEŞKIRINA AGIRÊ NEWROZÊ HATE KIRIN
Di vê wateyê de divê em sala 2025’an bikin sala ku gelê Kurd bi Rêbertiya xwe re hevdîtin bike û têkoşînê bigihîne serketinê. Ji bo ev îrade bi hemû heybeta xwe derkeve pêş, em bang li hemû gelê xwe, jin, ciwan, zarok, dost û her kesê alîgirê azadî û demokrasiyê dikin ku ji 7’an heta 70’ê em agirê Newrozê geş bikin û vîna Newrozê bi serketinê tacîdar bikin. Ji bo vê divê her kes biherike qadên Newrozê, demokrasiyê biqîre û starta têkoşîna ku azadiya fîzîkî ya Rêber Apo misoger dike, bide. Ev Newroz bila bibe peymana xwegihandina Rêberê xwe û misogerkirina azadiya jinê û gelan. Piştî 2637 salan bila ev Newroz ji bo gelan û jinan bibe mizgîniya serketinê. Li ser vê bingehê em cejna Newrozê ya gelê xwe û tevahiya gelan, bi xeta gel û kesayeta azad a Newrozê ya Rêberê Gelan Rêber Apo silav û pîroz dikin.”
