Di 22’yê Sibata 2026’an de komeke mafnasan û endamên saziyên mafên mirovan ji welatên Ewropayê derbasî Rojavayê Kurdistanê bû. Kom bi rêya Daîreya Têkiliyên Derve ya Rêveberiya Xweser hat herêmê. Dê kom têkildarî binpêkirinên li Sûriyeyê pêk tên serlêdana saziyên hiqûqî û mafên mirovan bike û dûre raporekê amede bike. Komê bi Meclisa Edaleta Civakî ya Cizîrê re hevdîtinek pêk anî.
Yek ji endamên komê wezîrê edaletê yê Îzlandayê yê berê Ögmundur Jonasson e. Jonasson li ser armanca komê ya hatina Rojavayê Kurdistanê ji ajansa me re axivî.
Jonasson diyar kir ku ew dixwazin bûyer û binpêkirinên li Rojava û herêmê pêk hatine bibînin û lêkolîn bikin û wiha axivî: “Koma me ji gelek kesên pispor ên di aliyê tibî û qanûnî de pêk tê. Binpêkirinên ku li Rojava çêdibûn bala min kişandin. Ji bo min girîng e ku ez bibînim gel di kîjan rewşê re derbas dibe. Lê ya esasî em ji bo karê mirovî hatine. Em ê niha xebatekê bimeşînin, lêkolîn bikin û bi xwe bibînin.”
Jonasson destnîşan kir ku ew ê bi kesayet, şahidên bûyeran û saziyan re hevdîtinan bikin û wiha got: “Niha me civînek li dar xist, me saziyên dadmendiyê guhdar kirin û di aliyê zagonî de agahî girtin. Me di civînê de nakokiyên ku hikumeta demkî ya Şamê li dijî me baştir fêm kir. Ji aliyekî de em ketine pêvajoya entegrasyonê û aliyê din jî zehmetiyên kûr di aliyê dadmendiyê de hene. Ji aliyekî de em qala entegrasyonê dikin û ji aliyekî de jî dorpêça ser Kobanê didome. Em hatine ku agahiyan bigirin.”
Jonasson da zanîn ku dê ew di encama hevdîtin û lêkolînên xwe de raporekê amede bikin û parve bikin, her wiha bigihînin sazî û aliyên eleqedar.
