Fermandariya Giştî ya Hêzên Ewlekariya Hundirîn a Bakur û Rojhilatê Sûriyeyê têkildarî komkujiyê daxuyanî da.
Di daxuyaniyê de hate gotin “Roja Şemiyê (20 Îlon) saet derdora 19.00’an komên çete yên girêdayî hikumeta Şamê yên destekê ji dewleta Tirk digirin, sûcek din li dijî şêniyan kir. Komên çete yên girêdayî hikumeta Şamê li gundê Um Tîna yê Dêr Hafirê yê gundewarê rojhilatê Helebê bi dronan, piştre bi obîsan rasterast malên sivîlan kirin armanc. Di encamê de jin û zarok di nav ve 7 sivîl şehîd bûn û 4 jî birîndar bûn. Ev sûc li rêze komkujî û binpêkirinên sîstematîk ku çete pêk tînin, zêde dibin.
Navên şehîdên êrişê wiha ne: Emîne Mihemed El Ezawî (75), Fatima Heye Ubeyd (65), Emîne Mihemed El Hemze (22), Ayşe Hemze El Ubeyd (18), Hemze Ubeyd El Rezaq (4), Ebdulxenî Rehman El Ubeyd (salek) û Rehef Hisên El Ezawî (23).
Navên birîndaran wiha ne: Cuma Hemûd El Mihêsin (60), Meryem Hemûd El Mihêsin (55), Helîme Mehmûd El Mihêsin (65) û Emîne Hemûd El Emûra (20).
Em vê komkujiya hovane bi tundî şermezar dikin. Armanc jê şikandina îradeya gelê me û belavkirina tirsê di nava sivîlan de ye. Em ji şêniyên xwe re diyar kirin ku ev binpêkirin wê bêhesab derbas nabe. Di heman demê de em civaka navneteweyî wekî berpirsê parastina gelê Sûriyeyê, rawestandina sûcên rêxistinkirî dibînin.
Bila serê malbatên şehîdên vê komkujiyê sax be û ji birîndaran re şîfaya lezgîn dixwazin.”
