Kesên di Komkujiya Helepce, Komkujiya Beyazît û Komkujiya Taxa Gaziyê de jiyana xwe ji dest dane, li gelek bajaran bi çalakiyên cur bi cur hatin bîranîn.
ÎZMÎR
Li Îzmîrê bi bangewaziya Komeleya Alîkarî û Piştevaniyê ya bi Malbatên Xizmên Xwe Winda Kirine re ya Anatoliyayê, (ANYAKAY-DER) li avahiyê DEM Partiyê yê Îzmîrê ji bo bîranîna komkujiya Helebce û Beyazîtê daxuyaniya çapemeniyê hat lidarxistin. Hevseroka ANYAKAY-DER’ê Rahîme Turan, Dayikên Aştiyê û gelek kes tev li bîranînê bûn.
Daxuyanî bi deqeyeke rêzgirtina ji bo qurbaniyên komkujiyan dest pê kir. Hevserokê DEM Partiyê yê Îzmîrê Mehmet Kuruş axivî. Kuruş kesên hatine qetilkirin bi bîr anî û got ku ew ê feraseta komkujiyê ji bîr nekin. Endamê Komeleya Lêkolînên Ziman û Çandê ya Avestayê (Avesta) Ramazan Kaygisiz têkildarî bîranîna kesên jiyana xwe ji dest dane helbestek xwend.
Platforma Şaxên KESK’ê têkildarî her sê komkujiyan daxuyaniyeke nivîskî da û kesên di qetlîamê de jiyana xwe ji dest dane bi bîr anî.
EDENE
Rêxistina DEM Partiyê ya Edeneyê bi munasebeta Komkujiya Helebceyê li Parka Înonu daxuyaniya çapemeniyê lidar xist. Di çalakiyê de pankarta “Helepce nayê jibîrkirin” hate vekirin. Namzetên Hevşaredariya Bajarê Mezin a Edeneyê û yên navçeyan, TJA, Dayikên Aştiyê, Rêveberên DBP, AYKAY-DER, AATUHAY-DER û ÎHD tev li daxuyaniyê bûn.
Di daxuyaniyê de hevserokê DEM Partiyê Seyfettîn Aydemîr axivî û tevî bîranîna qurbaniyên komkujiyan, anî ziman ku ew ê li dijî polîtîkayên qetlîam û çewisandinê heya dawiyê li ber xwe bidin.
Namzetê Hevşaredariya Bajarê Mezin a Edeneyê Mahfûz Guleryuz diyar kir ku ew ê heya ku aştiyê bînin welat, dê têbikoşin.
AMED
Platforma Ked û Demokrasiyê li Parka Koşuyolû ya navçeya Rezan a Amedê daxuyanî da. Di çalakiyê de pankarta “Helebce naye ji bîrkirin” hate vekirin. Di daxuyaniyê de Berdevkê Demê yê Platformê Bawer Babur xwend. Babur da zanîn ku komkujî şermezariyeke mezin a dîroka mirovahiyê ye û got: “Em dizanin ne tenê Saddam Huseyîn, dewletên li herêmê, Yekitiya Ewropayê, Emerîka, û hemû hêzên navneteweyî berpirsyar in. Divê baş bê zanîn ku heya pirsgirêka Kurd bi rêyên demoratîk neyê çareserkirin dê aştî û aramî neyê Rojhilata Navîn. Me Helebceyê ji bîr nekir, em ê ji bîr nekin û dê nedin jibîrkirin.”
Hevseroka DEM Partiyê ya Amedê Pinar Sakik jî diyar kir ku Kurd rastî gelek zilman hatine û wiha axivî: “Tevî van tiştan Kurd di siyaseta cîhanê de bûn aktoreke diyarker. Em pişta xwe nadin êş û nirxên xwe. Helepce jî yek ji van e.”
SÊRT
Partiya Herêmên Demokratîk (DBP) û Partiya Wekhevî û Demokrasiyê ya Gelan (DEM Partî) bi boneya salvegera Komkujiya Helebceyê li ber der deriyê avahiya xwe daxuyaniyek dan. Di daxuyaniyê de pankarta “Em Komkujiya Helepce ji bîr nakin” hat vekirin. Parlementera DEM Partiyê ya Sêrtê Sabahat Erdogan Saritaş, namzetên hevşaredariyê yên DEM Partiyê Safiya Alagaş û Mehmet Kaysî, Meclîsa Dayikên Aştiyê, aktivîstên Tergera Jinên Azad (TJA) û hevserokên navend û navçeya navendî yên DBP û DEM Partiyê tev li daxuyaniyê bûn.
Daxuyanî ji hêla hevserokê DBP’ê yê Sêrtê Ferhat Bozkûrt ve hat xwendin. Bozkûrt, anî ziman ku 36 sal berê di 16’ê Adara 1988’an de Kurd ku yek ji gelên qedîm ê Rojhilata Navîn e, dîsa rastiyê hovitiyeke mezin hat. Bozkûrt, diyar kir ku hêza hewayî ya Iraqê bi çekên kîmyewî êrîşî bajarê Helebceyê kir û di rojekê de zêdetirî 6 hezar Kurd hatin qetilkirin û wiha axivî: “Bi rastî jî gavên komkujiya Helebceyê li ber çavê cîhanê hat avêtin. Rejîma Baasê ku bi destê Serokê Iraqê Saddam Huseyîn, bi hinceta ku Kurd alîkariya Îranê dikin, ji bo tepisandina muxalefeta Kurd a li Herêma Kurdistanê pêş dikeve û kêmkirina nifûsa Kurdan a li Kerkûkê, li dijî Kurdan ‘Tevgera Enfalê’ da hat destpêkirin. Tenê gaza kîmyewî ne avêtin Helebceyê, bi hilweşandina xaniyan a bi buldozeran jî gund hatin valakirin. Tê gotin ku di dema Enfalê de derdora 180 hezar Kurd hatin qetilkirin.”
Bozkûrt, da zanîn ku bi vî sûcê li hemberî Kurdan, hikûmeta Seddam Huseyîn weke hukûmeteke jenosîdê ku sûcê li dijî mirovahiyê kiriye, derbasî dîrokê bû. Bozkûrt, diyar kir ku tevî vê hewldana qirkirinê jî Kurdan tu carî dev ji daxwazên xwe yên xwerêvebirinê û azadiyê berneda û wiha got: “Li hemberî zext, komkujî û tundiyê Kurdan têkoşîna xwe ya aştî, azadî û demokrasiyê berfirehtir kirin û li Rojhilata Navîn derfetên jiyana hevbeş afirandin. Em komkujiya helepceyê ji bîr nakin. Em di salvegera komkujiyê de kesên ku ev komkujiyê pêk anîne lenet dikin.”
RIHA
Platforma Ked û Demokrasiyê li pêşiya Navenda Kar a Ahmet Bahçivan a li navçeya navendî ya Halîliyeyê daxuyaniya çapemeniyê lidar xist. Tevî pêkhateyên platformê, rêveberên DBP û DEM Partiyê, namzetên Hevşaredariyê yên Şaredariya Bajarê Mezin a Rihayê û navçeyan, Dayikên Aştiyê, nûnerên saziyên sivîl û gelek welatî tev li daxuaniyê bûn. Di çalakiyê de pankarta “Me komkujiya Helebceyê ji bîr nekir, em ê nedin ji bîrkirin” hate vekirin. Berdevka Plaftormê ya Demê û Hevseroka Şaxa Egîtîm Sen a Rihayê Ozlem Ulutaş Şengul kesên di komkujiyê de jiyana xwe ji dest dane bi bîr anî û da zanîn ku di roja me de jî bi rêbazên cuda komkujî tên domandin.
Piştre Namzetê Hevşaredariya Bajarê Mezin ê Rihayê yê DEM Partiyê Celaledîn Erkmen jî bal kişand ser rola hêzên navneteweyî ya di komkujiyê de û got ku ji bo komkujîyeke wekhev neyê jiyîn divê pirsgirêka Kurd bi rêbazên demokratîk were çareserkirin.
DEM PARTÎ LI 8 NAVÇEYAN DAXUYANÎ DA
Rêxistinên navçeyên Sêwereg, Serêkaniyê, Wêranşar, Curnê Reş, Hewag, Pirsûs, Bêrecûk û Xelfetiyê yên DEM Partiyê li pêşiya avahiyên xwe daxuyanî dan û komkûjî şermezar kirin. Di daxuyaniyan de peyamên yekitiya neteweyî hatin dayîn.
COLEMÊRG
Li Colemêrgê bi tevlîbûna Cîgirê Hevserokên Giştî yên DEM Partîyê Vezîr Coşku Parlak, Namzetên Hevşaredariya Colemêrgê, rêveberên DBP û DEM Partiyê yên bajar û sedan kes daxuyanî hat dayîn. Hevseroka DEM Partiyê ya Colemêrgê Humeyra Armut daxuyaniyê xwend. Armût diyar kir ku komkujî nekarîn pêşî li têkoşîna azadî û wekheviyê ya gelê Kurd bigire û kesên komkujî pêk anîne lenet kir.
ÎDİR
Rêxistinên TJA, DBP û DEM Partiyê yên Îdirê li Kolana Cûmhûriyetê daxuyaniyek dan çapemeniyê. Daxuyanî ji bo bîranîna kesên hatin qetilkirin bi deqîqeyek rêzgirtinê destpê kir.
Hevserokê DBP’ê yê Îdirê Mehmet Sekman di daxuyaniyê de axivî û got, “Di dema Tevgera Enfalê de nêzî 180 hezar kes hatine qetilkirin” û komkujî şermezar kir.
WAN
Platforma Ked û Demokrasiyê ya Wanê li pêşiya Navenda Kar a Aydin Perîhan daxuyanî da. Daxuyaniyê Berdevkê Demê Ekrem Pala xwend û wiha got: “Gelê Kurd rastî sûcê şer, qirkirin û tevahî sûcên li dijî mirovahiyê hatin. Em careke din komkujiyên Helebce, Gazî û Bayazitê lenet dikin. Em van qetlîaman ji bîr nakin û dê nedin jibîrkirin jî.”
ÊLIH, BEDLÎS, ŞIRNEX…
Li Êlih, Bedlîs, Şirnex û navçeyên wê Hezex, Cizîr û Silopiyayê jî bi tevlîbûna rêxistinên Navend û navçeyan ên DBP û DEM Partiyê, Dayikên Aştiyê, TJA, OHD Platfomên Ked û Demokrasiyê, rêxistinên saziyên sivîl, parlamenter, namzetên hevşaredariyên bajar û navçeyan û gelek welatî tev li daxuyaniyên bîranînê bûn. Di daxuyaniyan de kesên di komkujiyan de hatine qetilkirin hatin bi bîranîn û peyamên yekitî û têkoşînê hatin dayîn. Her wiha hat gotin ku komkujiyên hatine kirin dê neyên jibîrkirin.
