Serokê Meclîsê Nûman Kûrtûlmûş û Serokê Giştî yê MHP’ê Devlet Bahçelî li Meclîsê 25 deqeyan hevdîtinek kirin.
Piştî hevdîtinê civîneke hevpar a çapemeniyê hate lidarxistin. Kûrtûlmûş piştî banga 27’ê Sibatê ya Rêber Apo û biryarên kongreyê yên PKK’ê got, “Li Tirkiyeyê pêvajoyeke nû destpê kiriye.”
Kûrtûlmûş got, “Ev pêvajo bi rengekî şênber, li pêş çavên miletê me û bi rengekî plankirî ji bo serxistina wê ji niha û pê ve wezîfe dibe para Meclîsa Milet a Mezin a Tirkiyeyê.”
Kûrtûlmûş gavên ku divê li Meclîsê bêne avêtin bi vî rengî rêz kir:
“Li meclîsê divê komîsyonek bi temsîla hemû partiyên siyasî bê avakirin, bi vî rengî pêvajo bê şopandin, kontrolkirin û pêşengî jê re bê kirin. Têkildarî vê pêvajoyê me fikrê xwe careke din parve kir. Hêvîdar im ku dema bê wê Meclîs vê berpirsyariya xwe ya dîrokî bi cih bîne, bike ku bi rengê herî bedew bi encam bibe. Di demekê de ku li herêmê ewqasî guhertinên mezin pêk tên, firsendeke dîrokî hatiye ber Tirkiyeyê. Ji bo vê firsendê jî pêwîstî bi berpirsyariyeke mezin heye. Ev pêvajo ne pêvajoyeke welê ye ku partiyeke siyasî bi tena serê xwe karibe bimeşîne. Mijareke dan û standin nîne. Avakirina hevgirtineke bi dilxwazî ye, avakirina pêvajoya xwişk û biratiyê ye. Hêvîdar im her kes wê bikeve binê bar û berpirsyariya xwe bi cih bîne. Hêvîdar im di bin kontrola meclîsê de di nava artmosfereke muzakereyan de ev mijar wê bi ser bikeve. Li vir berpirsyarî ya meclîsê ye. Bang li partiyên siyasî dikim ku bibin hevparê vê berpirsyariyê.”
Kûrtûlmûş diyar kir ku wê di dema bê de eşkere bibe bê meclîs çawa bixebite û bi raya giştî re bê parvekirin. Li ser pirsa, gelo komîsyon wê beriya betlaneya meclîsê ava bibe yan na, Kûrtûlmûş bersiva ‘di dema herî nêz de’ da.
